Masupog nga Intel Asset sang 62nd IB sa Moises Padilla, Ginsilotan

Abril 26, 2024

Ka JB Regalado
Spokesperson
Leonardo Panaligan Command
New People’s Army
Central Negros Guerrilla Front

Tampad nga gina-angkon sang Leonardo Panaligan Command-New People’s Army (LPC-NPA) ang madinalag-on nga pagpatuman sang silot-kamatayon kay Tongkai Golez sang Sityo Cuyawyaw, Barangay Inolingan, Moises Padilla, Negros Occidental alas 7:30 sang gab-i, Abril 24.

Si Golez ang ginpamabatbatan sang silot-kamatayon sadtong Oktubre 2023, matapos napamatud-an sang rebolusyonaryong korte sang pumuluyo nga masupog nga intel asset sang 62nd IB kag may utang nga dugo sa pumuluyo kag bug-os nga rebolusyonaryong kahublagan sa Central Negros.

Si Tongkai ang masupog nga nagapaniktik sa hulag kag aktibidad sang NPA sa lugar kabaylo sang kwarta nga pabuya halin sa pasistang 62nd IB. Siya ang naggiya sa operasyon sang 62nd IB nga nagreyd sa yunit sang NPA sa Sityo Napiluan, Barangay Quintin Remo, Moises Padilla sadtong Mayo 20, 2023 nga nagresulta sang kamatayon sang mga sibilyan nga sanday Juliven Ramirez kag Evelyn Meren (mag-asawa) kag Ruben Obidas sang nasambit nga lugar. Samtang patay man sadto sila Julwar “Ka Ryan” Loviano kag Alvin “Ka Dagger” Bayno, mga isganan nga Pulang hangaway sang banwa.

Ini ang kongkreto nga sabat sang CPP-NPA sa ginapangayo nga hustisya sang mga pamilya nga biktima sang pasismo kag terorismo sang estado batok sa pumuluyo kag bug-os nga rebolusyonaryong kahublagan. Magserbe man ini nga mabaskog nga paandam sa tanan nga may salabton kag may utang nga dugo sa pumuluyo kag rebolusyon.

Madumduman, sang nagligad nga Abril 11 ginpatuman man sang LPC-NPA ang pagsilot sang kamatayon kay Danny Boy Bartolome sang Sityo Paho, Barangay Camandag, La Castellana, Negros Occidental.

Ginamanduan ang tanan nga yunit sang LPC-NPA nga maglunsar sang lapnagon nga mga qtaktikal nga opensiba. Pabayaron ang napamatud-an na sang korte sang pumuluyo nga may mga salabton nga grupo, indibidwal labi na ang berdugong AFP-PNP kag iban pa nga mersenaryong makinaryas sang estado.###

Mangunguma, Ginpatay sa 62nd IB kag PNP sa Peke nga Engkwentro sa Moises Padilla

Abril 4, 2024

Ka JB Regalado
Tagpamaba
Leonardo Panaligan Command
New People’s Army
Central Negros Guerrilla Front

Wala huya nga ginhinabon naman sang gintingob nga berdugong pwersa sang 62nd IB kag 2nd Negros Occidental Provincial Mobile Force Company-Philippine National Police (NOCPMFC-PNP) ang peke nga engkwentro sa ala “tokhang” kag hungod nga pagtiro-patay kay Marlon Catacio sa Sityo Ngalan, Barangay Quintin Remo, Moises Padilla, Negros Occidental alas 5:35 sang kaagahon Abril 4.

Indi katapo sang New People’s Army (NPA) si Catacio. Sibilyan nga nagapanguma kag nagapanguling lamang sa lugar si Catasio sa pihak sang kapigaduhon tuga sang kalamidad sang El Niño sini nga panahon. Indi man matabo ang engkwentro bangud wala man sang NPA sa nasambit nga lugar.

Lunsay kabutigan kag pagpatalang ang palayag sang mga pasistang tropa ilabe na ni Col. Jayjay Javines ang tigtaghol sang 3ID Philippine Army para tabunan ang ila palpak nga AFP-PNP joint operation batok sa Leonardo Panaligan Command(LPC-NPA) sa Central Negros.

Mabaskog gid nga ginakondenar sang LPC-NPA ang brutal nga pagpatay kay Marlon Catacio lakip na ang kakugmat kag pagdislokar sang kapin 150 ka mga residente lakip na ang inosente nga mga kabataan. Indi na bag-o ang ini nga kalakasan sang AFP kag PNP kag isa lang si Catacio sa biktima sa mga madata na nga pagpamatay sang mga inosenteng mangunguma sa Central Negros. Nagapakita nga desperado ang AFP, PNP kag mapintas nga rehimen ni US-Marcos Jr sa pagdugmok sang bug-os nga rebolusyonaryong kahublagan idalum sa State of Stable Internal Peace and Security (SIPS) sa isla sang Negros.

Sumugod nga nagpungko si L/Col. Evelio Ilanga III bilang 62nd IB Commanding Officer, ini ang ikaduha na ka higayon nga ginahinabon ang peke nga engkwentro. Una sadtong Marso 15,  ginpaarakan-luthang kag iligal nga ginlusob ang panimalay sang pamilya Pecore sang platun nga tropa sang 62nd IB sa Sityo Mabato, Brgy. Talaon, La Libertad, Negros Oriental. Ikaduha, ang wala kaluoy nga pagpatay kay Catacio subong, Abril 4, sa Moises Padilla.

Bisan anu pa man, manalaytay sa huna-huna kag balatyagon sang militar ilabe na ni L/Col. Evelio Ilanga III ang tatak sang pasismo kag terorismo sang mapintas nga estado. Ini ang magatulod sa pumuluyo sa kaumahan sang Central Negros nga magbato paagi sa pagpili kag mag-usoy sa husto nga banas sang armadong paghimakas upod sa CPP-NPA para sa tunay nga demokrasya kag pungsodnon nga kahilwayan. ###

#TroopAlert | Militarisasyon sa Central Nagasingki sa Tunga sang Kalamidad

Marso 13, 2024

Nagahara-hara nga nagapanglusob ang mga berdugong tropa sang 62nd IB sa mga komunidad sang mangunguma sa mga binukid sang Moises Padilla kag La Castellana sa Negros Occidental kag Guihulngan City, Negros Oriental.

Marso 12 tubtob subong nga adlaw Marso 13, may mga kolum sang militar ang makit-an sa Brgy. Tacpao, Guihulngan City. Pilit nga ginapamalay-balay ang mga pumuluyo agud patambungon sa pulong-pulong. Ginapahug ang mga pumuluyo, ginapasikto nga mga supporter sang NPA kag pilit ginapasurender. Kadungan man sini, may platun man sang 62nd IB nga naga-operasyon sa Sityo Binil-iwan, Brgy. Kalupaan, Guihulngan City.

Pabilin gihapon ang presensya sang pasistang militar sa mga sityo sang Linggahub kag Mercedes tanan sang Brgy. Sag-ang, La Castellana. Nagatiner ang nasambit nga berdugong tropa sa mga panimalay sang pumuluyo.

Sa Moises Padilla, Marso 13, may isa ka platun sang 62nd IB nga nagatiner sa Day Care Center sa Sityo Tibubong, Brgy. Quintin Remo. Samtang sini lang nga aga, Marso 13, may 20 ka tropa sang 62nd IB nga nagatiner sa barangay hall sang Brgy. Macagahay sang amo gihapon nga banwa. Ginapangsaka man ang mga kabalayan malapit sa publiko nga mga lugar nga ginatineran sang berdugong tropa.

Dugang nga nagaperwisyo ang presensya sang pasistang militar sa kaumahan sa tunga sang kalamidad dulot sang El Niño.

#62ndIButigon
#AFPerwisyo
#LayasPasistangMilitar

Reference:
Ka JB Regalado
Tagpamaba
Leonardo Panaligan Command-New People’s Army
Central Negros Guerrilla Front

#TroopAlert! | FMO sa Central Negros, Perwisyo sa mga Mangunguma

Enero 14, 2024

Naglab-ot na sa 250 ka tropa sang kumbinado nga pwersa sang pasistang 62nd IB kag Special Action Force-Philippine National Police (SAF-PNP) ang nagalusob sa mga komunidad sang mangunguma sa Guihulngan City, Negros Oriental kag Moises Padilla, Negros Occidental halin Enero 12-14.

Makit-an lang sang pumuluyo ang 40 ka berdugong 62nd IB nga nagapangsaka-saka sa mga kabalayan sang mga mangunguma sa Sityo Bonbon, Brgy. Hinakpan, Guihulngan City. Kapin man sa 60 ka pasistang militar ang nagalambiyong sa Sityo Tibubong kag Sityo Binataan, tanan sang Moises Padilla.

Samtang mentinado ang 120 ka elemento nga may tatlo ka kolum sang mersenaryong tropa sang SAF-PNP kag berdugong 62nd IB sa Sityo Mainit, Brgy. Bulado, Guihulngan City. Sini lang aga, halos 30 ka pasistang 62nd IB ang bag-o lang nag-abot sa Sityo Magkanaway, Brgy Basak, Guihulngan. Ginteniran nila ang Magkanaway Elementary School.

Nagtuga ini sang kakugmat kag nagperwisyo sa malinong nga pagpuyo sang mga mangunguma sa lugar.

#AFP/SAF-PNPerwisyo!
#LayasPasistangMilitar!

Reference:
Ka JB Regalado
Tigpamaba
Leonardo Panaligan Command-New People’s Army
Central Negros Guerrilla Front

62nd IB, ginhinabonan ang akawntabilidad sa pagpatay sang mag-amay nga Templatura

Enero 8, 2024

Subong nga adlaw, desperado nga nagpatigayon ang 62nd IB kag National Task force (NTF)-Elcac upod sa kapulisan sang Moises Padilla, Negros Occidental sang “pulong-pulong” sa covered court sang Brgy. Montilla, Moises Padilla, Negros Occidental. Pilit nga ginapatambong ang pumuluyo para tursihon sang berdugong 62nd IB ang ila akawntabilidad bilang CAFGU handler kag hinabonan ang liability ni  Lt. Col. William Pesase Jr bilang commanding officer sang pasistang 62nd IB.

Madumduman nga gintiro-patay ni Donan Sosia, isa ka CAFGU, ang mag-amay nga Templatura kag napilasan ang duha pa sang patarasak ini nga nagapaniro sa nasambit nga baryo sadtong Enero 2.

Subongman, may presensya sang 62nd IB nga nagapanglugayawan sa Sityo sang Paluhan, Brgy Sandayao kag sityo Agbagakay sang Brgy Binobohan tanan sang Guihulngan City, Negros Oriental.

Ibuyagyag ang mga kabutigan kag kontra-pumuluyo nga kalakasan sang desperadong 62nd IB, PNP kag NTF-Elcac!

#AFP-PNPerwisyo!
#NTF-ElcacCorrupt!

Reference:
Ka JB Regalado
Tigpamaba
Leonardo Panaligan Command-New People’s Army
Central Negros Guerrilla Front

Masaker sa mga Mangunguma sa Moises Padilla, Ginakondenar sang NPA

Enero 5, 2024

Ka JB Regalado
Tagpamaba
Leonardo Panaligan Command
New People’s Army
Central Negros Guerrilla Front

Mabaskog nga ginakondenar sang Leonardo Panaligan Command-New People’s Army (LPC-NPA) ang wala kaluoy nga pagmasaker sa mag-amay nga mga mangunguma nga sanday Gudofredo Templatura, 70 anyos kag John Albert Templatura, 32 anyos, anak ni Gudofredo, may asawa kag kabataan tanan residente sang Purok Sab-a, Brgy Montilla, Moises Padilla, Negros Occidental pasado alas 4:00 sang hapon, Enero 2. Bangud sang patarasak nga pagpaniro nagresulta man sa pagkapilas sang duha pa ka iban nga sanday Marites Rafols kag Jessel Abaño sang amo gihapon nga lugar.

Sa inisyal nga pagpangusisa sang LPC-NPA, responsable sa pagmasaker sa mga biktima si CAFGU Donan Sosia, aktibo nga katapo sang CAFGU idalom sa 62nd IB Patrol Base sa Brgy. Alingasaw, Moises Padilla. Nagluntad ang pagmasaker sa mag-amay Templatura matapos ang pinamilya nga komosyon samtang nagaselebrar si Albert Templatura sang iya nga kaadlawan.

Sa pinamilya nga komosyon, ginakabig nga pribado ang pagresolbar apang kon indi na masarangan sang mga natungdan, may kinamatarung ang barangay tanod nga magresponde paagi sa mando sang Barangay Kapitan. Kon indi pa gid masarangan sang local government unit (LGU), papel na sang Philippine National Police (PNP) para ipaluntad ang kalinong kag katawhay sa lugar.

Wala sang kinamatarung ang CAFGU nga magresponder nga naga-isahanon kag armado pa kon wala sang mando halin sa iya superyor. Wala man nagapati ang LPC-NPA nga si CAFGU Donan Sosia lamang ang mangatubang sini nga kaso. Matuod nga direkta nga ginkomiter ni Sosia ang pagmasaker gamit ang iya armas, apang napaidalum ini sa command and control sang 62nd IBPA sa pagpanguna ni L/Col. William Pesase Jr-62nd IBPA Commanding Officer.

Wala rason si Sosia nga magpakamartir. Kinahanglan nga magkooperar si Sosia. Magsugid sang matuod sa publiko kon sin-o pa ang iya mga kaupdanan kag sin-o ang ila superyor nga nagmando sa ila agud himuon ini nga krimen. Wala man sang rason ang 62nd IB nga himuon nga tapalan si Sosia. Mas dako ang salabton ni L/Col.William Pesase Jr sa hambalanon sang command responsibility sa sini nga pagmasaker nga nagresulta sang kamatayon sang mag-amay nga Templatura kag pagkasamad sang duha pa nga iban.

Ginamanduan sang LPC-NPA ang yunit sang NPA nga malapit sa lugar sang insidente sa paglunsar sa isa ka maid-id nga imbestigasyon. Ihatag ang nagakaigo nga hustisyà sa pamilya sang mga biktima kag pasabton ang mga mastermind sa likod ni CAFGU Donan Sosia.###

Opensiba sang LPC-NPA, 4 Ka Pistola Nakumpiska

Agosto 16, 2023

Ka JB Regalado
Tagpamaba
Leonardo Panaligan Command
New People’s Army
Central Negros Guerrilla Front

Madinalag-on nga ginpatuman sang isa ka yunit sang  Leonardo Panaligan Command-New People’s Army (LPC-NPA) ang operasyon dis-arma kag pagpa-andam kay Pen-pen Fajardo sang Sityo Mora, Brgy. Pinukawan, Vallehermoso, Negros Oriental sadtong Agosto 13.

Si Fajardo ang katapo sang Guardians nga may angot sa militar. Palahubog, abusador kag nagapamahug sa mga residente sa lugar. Taghupot sang iligal nga armas-luthang kag masami nagapalupok sang armas kon mahubog. Nagtuga sang kahadlok kag kakugmat sa pumuluyo.

Nakumpiska sang NPA kay Fajardo ang apat ka pistola (isa ka .38 caliber pistol, isa ka
.357, duha ka frontier) kag mga bala.

Indi tanan nga katapo sang Guardians ang target sang NPA kundi ang kaangay lang sang may  kontra-pumuluyo nga kalakasan ni Pen-pen Fajardo.

Samtang, ginapanaugan man sang silot kamatayon sang Rebolusyonaryong Korte sang Pumuluyo si Jomarie Benitez sang sityo Inarawis, Brgy Quinten Remo, Moises Padilla, Negros Occidental sadtong Agosto 5, sang gab-i.

Wala duha-duha nga ginpatuman sang yunit sang Leonardo Panaligan Command-New People’s Army ang nasambit nga pagsilot kay Jomarie Benitez sa masunod nga mga kaso:

1. Si Jomarie ang responsable nga nagagiya sa tropa militar sa brutal nga pagpatay kay Jose “jojo” Albores sang Lower Tiyos, Brgy Quinten Remo, Moises Padilla sadtong Abril 18, 2023.

2. Responsable man siya sa paggiya sa militar sa pagmasaker sa pamilya Ramirez sadtong Mayo 20, 2023 sang kaagahon diin brutal nga ginpatay sang militar ang mag-asawa nga sanday Julieven Ramirez kag Evelyn Meren. Patay man si Ruben Obidas, Alvin “Ka Dagger” Bayno kag Julwar “Ka Ryan” Lobiano.

3. Siya man ang nagtudlo sa militar sa nahamtangan sang pilason nga si Marvic Ebarle kag Romy Catasio sa Brgy Montilla, Moises Padilla samtang nagapaayo ini. Nadumduman, brutal nga ginpatay si Ebarle kag Catasio sang berdugong 62nd IB samtang nagahulat ang duha sa ila masakyan sadtong Hulyo 20, 2023 sang gab-i sa sityo Balunggay, Brgy Montilla, Moises Padilla, Negros Occidental.

Silotan ang mga traidor sa pumuluyo upod sa berdugo, pasista kag mersenaryong militar! Isulong ang inaway banwa tubtob sa kadalag-an.###

#TroopAlert! | Masingki nga Militarisasyon sa Central Negros Nagapadayon

Agosto 13, 2023

Padayon nga ginalusob sang berdugong 62nd IB ang mga komunidad sang mangunguma sa Guihulngan City kag Canlaon City sang Negros Oriental, Moises Padilla kag La Castellana sang Negros Occidental. Pilit nga ginapangsaka-saka ang mga kabalayan kag ginahimo nga kampo militar ang mga buluthuan.

Ang presensya sang militar sa mga lugar ang nagperwisyo sa pagpanguma kag pagpangabuhi sang pumuluyo. Ginasunud-sunod sila sang pasistang tropa sang 62nd IB kon magkadto sila sa ila mga uma kag bisan pa gani sa pagpanglawig sang ila mga kasapatan. Ginapunggan sila sang mga militar nga maggwa sa ila mga puluy-an kag ginapahug nga kon anu matabo sa tropa militar kon mggwa sila sa ila puluy-an balikan sila sang militar kag pamatyon. Nagtuga ini sang kahadlok sa mga residente ilabi na sa mga kabataan.

Halin pa Agosto 3 tubtob karun Agosto 13, padayon nga nagatiner ang 62nd IB sa Sityo Agulang Elementary School, Brgy. Villegas, Guihulngan City. Ginhimo nga kampo militar ang nasambit nga buluthuan. May kolum man sang militar nga nagapangsaka-saka sa mga kabalayan sa mga sityo sang Tampa kag Anahaw tanan sang Brgy. Nagsaha, Guihulngan City. May kolum man sang militar sa Sityo Mandi-e Gamay kag Dako, sakop sang Brgy. Magsaysay Guihulngan City.

Samtang gikan pa Agosto 5 tubtob subong, padayon man nga nagatiner ang masobra 50 ka berdugong militar upod sa mga CAFGU sang Casingan Army Detachment sa Kambairan Elementary School sang Sityo Kambairan, Brgy. Trinidad, Guihulngan City. Ginhimo man nga kampo militar ang nasambit nga buluthuan. Ara ang presensya ni Reymart Dayanan, Gerome Geronimo, Yuling Landisa, Regine Landisa kag Nano Montesino nga nagagiya sa militar sa pagpangsaka-saka sa mga kabalayan kag nagapamahug sa mga mangunguma. Ginapasibangdan nila ang mga residente nga mga suporter sang NPA. Samtang mentinado nga nagatiner ang pasistang 62nd IB sa Brgy. hall sang Brgy. Macagahay, Moises Padilla.

Agosto 12 may nag-abot nga masobra 50 ka tropa sang 62nd IB sa Brgy. Puso Proper, La Castellana. May kolum man sang militar sa Sityo Natuling, Brgy. Budlasan, Canlaon City.

Sa kabilugan, naglab-ot sa 8 ka kolum kag 200-250 ka tropa militar ang nakapakat sa magkatambi nga mga baryo sa Guihulngan City, Canlaon City, Moises Padilla kag La Castellana.

#62ndiberdugoPasistaKriminal!

#LayasPasistangMilitar!

Reference:
Ka JB Regalado
Tagpamaba
Leonardo Panaligan Command-New People’s Army
Central Negros Guerrilla Front

Peke nga Engkwentro sa Central Negros, Ginahinabon sang AFP sa ila Kapalpakan

Agosto 8, 2023

Ka JB Regalado
Tagpamaba
Leonardo Panaligan Command
New People’s Army
Central Negros Guerrilla Front

Wala huya nga nagapalayag si Lt. Col. William Pesase sang 62nd IB kag B/Gen. Orlando Edralin sang 303rd Bde PA sa publiko nga may natabo nga engkwentro sa tunga sang Leonardo Panaligan Command-New People’s Army (LPC-NPA) kag 62nd IB sa Guihulngan City, Negros Oriental kag Moises Padilla, Negros Occidental sadtong Agosto 5. Linubid nga mga kabutigan kag patalang sa publiko ang ini nga mga pahayag sang Armed Forces of the Philippines (AFP) agud hinabunan ang ila desperasyon kag kapalpakan sa pagwasak sang rebolusyonaryong kahublagan sa ila mga Focused Military Operations sa isla ilabe na sa Central Negros.

Wala sang lehitimo nga engkwentro sa tunga sang NPA kag tropa militar sa Sityo Li-ong, Brgy Imelda, Guihulngan City sadtong Agosto 5, alas 5:00 sang kaagahon. Wala man sang yunit sang NPA sa lugar. Ang matuod, tatlo ka lupok sang mortar halin sa Brgy. Villegas Army Detachment ang nagpukaw sa mga residente sang Brgy Nagsaha, Imelda, Balugo, Magsaysay kag Villegas tanan sang Guihulngan City. Halin alas 5:00 sang kaagahon tubtob alas 6:30 sang aga ang linupok sang mortar tuga sang patarasak nga pagpamomba sang 62nd IB ang nagkugmat sa nagakatulog pa nga mga residente sa lugar. Nagtuga ini sang kahalitan sa mga pananom kag kasapatan sang mga mangunguma sang nagtupa sa kalasangan sang “Issi”nga nahamtang sa boundary sang nasambit na nga mga baryo.

Indi man engkwentro ang natabo sa Sityo Cansimba, Brgy. Quintin Remo, Moises Padilla alas 9:00 pasado sadtong Agosto 5. Ang kamatuoran, hungod nga ginpaarakan sang tropa sang 62nd IB ang balay sang pamilya Blasco. Nagresulta sang pagkasamad ni Jonasio “Joe” Blasco, mangunguma kag amay sang nasambit nga pamilya. Bisan pilason si Blasco naninguha ini nga magpalayo sa naga-ulan nga bala halin sa pasistang militar. Sang nakita sang militar si Joe nga pilason, liwat nga ginpaarakan sang luthang tubtob nadulaan sang kabuhi ang biktima.

Indi katapo sang NPA si Jonasio Blasco. Simple nga mangunguma kag sibilyan si Blasco sa lugar. Biktima siya sang redtagging nga iskema sang mapintas nga estado halin pa sadtong tuig 2014. Ginapasibangdan siya sang militar nga suporter sang NPA rason sang pagkadislokar sang ila pangabuhian.

Taliwas sa ginawakal sang uhaw sa dugo, dalok sa ranggo kag mga butigon nga si Pesase kag Edralin sang AFP sa isla sang Negros. Indi kalinong ang gina-usoy nga banas sang AFP kundi terorismo, pasismo kag lunsay pagpamintas sa pumuluyong Negrosanon.

Mag-isa….maghimakas indi mahadlok! Hublasan ang pasismo sang rehimeng US-Marcos Jr! Isulong ang inaway banwa tubtob sa kadalag-an!###

#TroopAlert! | RMFB-7 kag 62nd IB sa Guihulngan City, Padayon Nagalapas sa CARHRIHL

Agosto 4, 2023

Agosto 2, alas 9:00 sang gab-i, may 30 ka tropa sang 62nd IB ang nagatiner sa mga kabalayan sa Sityo Tambis, Brgy. Tacpao, Guihulngan City, Negros Oriental.

Agosto 3, alas 6:00 sang aga, may presensya man sang 30 ka tropa militar sa Sityo Cambadlis, Brgy Imelda, Guihulngan City. Alas 11:00 sang aga sa amu gihapon nga petsa, may presensya man sang berdugong tropa nga nagatiner sa eskwelahan sang Sityo Agulang, Brgy. Villegas, Guihulngan City. Ginhimo nga kampo militar ang nasambit nga buluthuan.

Agosto 4, alas 5:00 sang kaagahon, may kolum sang militar nga nagatiner sa mga kabalayan sa Sityo Mandi-e Dako, sakop sang Brgy Magsaysay, Guihulngan City.

Samtang patarasak naman nga nagpalupok sang grenade launcher ang mga katapo sang 7th Regional Mobile Force Battalion (RMFBn) sa Sityo Amaga, Brgy. Balugo, Guihulngan City kag Sityo Mandi-e Dako, Brgy. Magsaysay, Guihulngan City alas 8:00 pasado sang aga, Agosto 3.

#LayasPasistangMilitar!
#PNP62ndiberdugoPasistaKriminal!

Reference:
Ka JB Regalado
Tagpamaba
Leonardo Panaligan Command-New People’s Army
Central Negros Guerrilla Front