#TroopAlert | 62nd IB Nagapamahug sa Pumuluyo sang Central Negros

Mayo 16, 2024

Sugod Mayo 11 tubtob karun nga adlaw Mayo 16, nagapabilin ang presensya militar sa mga komunidad sang mangunguma sa Moises Padilla, Negros Occidental, kag sa Canlaon City kag Guihulngan City sang Negros Oriental.

Mayo 16 makit-an ang 25 ka tropa sang 62nd IB sa Sityo Kambairan, Barangay Trinidad, Guihulngan City. Ang 10 ka pasistang tropa pilit nga nagapanaka-saka sa mga kabalayan sang nasambit nga sityo. Samtang ang 15 ka tropa sang nasambit nga militar ang naglunsar sang checkpoint nga nagtuga sang pagdelatar sa normal nga hulag kag pagsinalayo sang mga pumuluyo. Nagtuga ini sang kahadlok kag kakugmat sa mga kadam-an labi na sa mga gagmay nga kabataan sa lugar. May kolum man sang militar sa mga sityo sang Tuko kag Banderahan, sa ao gihapon nga barangay.

Samtang may kolum man sang 62nd IB nga nagatiner sa simbahan kag publiko nga plasa sang Sityo Banat-e, Barangay Macagahay, Moises Padilla. Pilit man nga ginasaka ang mga kabalayan sa pihak sang pagdumili sang mga residente.

Sa Sityo sang Malatanglad sakop sang Barangay Budlasan, Canlaon City, ginapangsaka-saka man ang kabalayan sang pumuluyo. Subong man, makita man ang kolum sang pasista kag berdugong tropa sa Sityo Proper sang Brgy Bucalan tanan sang Canlaon City, Negros Oriental.

#62ndIBerdugo
#AFPerwisyo
#LayasPasistangMilitar

Reference:
Ka JB Regalado
Tagpamaba
Leonardo Panaligan Command-New People’s Army
Central Negros Guerrilla Front

Sabat sang LPC-NPA sa mga Kabutigan sang 303rd BdePA

Mayo 16, 2024

Ka JB Regalado
Spokesperson
Leonardo Panaligan Command
New People’s Army
Central Negros Guerrilla Front

Daw basa nga kuring si B/Gen. Orlando Edralin sang 303rd BdePA nga nagapakitluoy sa Commission on Human Rights (CHR)- Negros Occidental agud kondenahon ang New People’s Army (NPA) kaangot sa asud-asod nga kadalag-an sini gikan Abril tubtob  Mayo batok sa mga espiya sang Armed Forces of the Philippines (AFP). Nahuy-an lang si Edralin nga nalutsan gihapon sila sang mga madinalag-on nga aksyon militar sang NPA sa likod sang pasulit-sulit kag istorya kuris-kuris nga kuno “dismantled” na ang mga larangan gerilya ilabi na ang Leonardo Panaligan Command (LPC-NPA) sa Central Negros.

Ang pasismo nga tatak sang AFP, Philippine National Police (PNP) kag iban pa nga mapintas nga makinaryas sang estado kag ang nagahuyango nga malakolonyal kag malapyudal nga sosyedad Pilipino bangud sang nagasingki nga krisis sa ekonomiya kag politika sa tunga sang kampo Marcos-Duterte nagtuga sang madalum nga banggi-anay sa hanay sang AFP, PNP kag iban pa nga partido pulitikal. Ang nagalala nga krisis sang ekonomiya sang sistemang kapitalismo, ang nagatulod sa pumuluyong Pilipino labi na ang Negrosanon nga usuyon ang makatarunganon nga dalan sang armadong paghimakas sa pagrebolusyon para sa tunay nga pagbag-o sosyal.

Hilway nga nagatungod ang CPP-NPA sang hilikuton masa agud pukawon, organisahon kag pahulagon ang pumuluyong Negrosanon sa pagtukod kag pagpalig-on sang baseng masa, pagpatuman sang agraryong rebolusyon kag pag-angat sa mas mataas nga halintang sang inaway banwa sa giya sang ika-tatlo nga kahublagan panadlong dira sa wala paghubas nga suporta sang masang Negrosanon. Kabaliskaran sa ginataghol ni Edralin nga “naglinapta nalang ang NPA” kag “makapalagyo ang NPA apang indi makatago.”

Tuman kalapad ang isla sang Negros, bisan pa magdupa ang tanan nga tropa militar kag mga kapulisan sa isla kag pila pa ka B/Gen. Edralin kag M/Gen. Sison ang mag-kapitbisig. Ang rebolusyon ang indi gid mapunggan sa pag-abante sandig na sa maragtason nga inagihan sang armadong paghimakas sa isla. Bangud wala malutos kag mawasak ang rebolusyonaryong kahublagan sadtong 1990 sang “Oplan Thunderbolt” sang militar nga kusog-kumpanya lamang ang NPA sa isla, ma’s labi na gid karun nga nagapabilin ang lima ka larangan gerilya.
 
Ang ginatikal nga yara sa idalum sang state of Internal Peace and Security (SIPS) ang isla sang Negros isa ka pinurga nga deklarasyon kag huna-huna sang 3ID, 302nd BdePA kag 303rd BdePA. Imbes nga SIPS, nahimo nga sip-sip bangud papogi-points lamang sang AFP, PNP kag NTF-Elcac agud papatihon ang lokal nga nagahari nga sahi, dalagkong burgesya komprador, agalon may duta kag engganyuhon ang mga dumuluong nga kapitalista sa bukas nga pagnegosyo sa probinsya. Indi man kaluwas ang AFP sa presyur kag pagpanulsol sang imperyalistang Estados Unidos sa tensyon sa tunga sang China kag Pilipinas sa West Philippine Sea kag pag-eskalar sang gyera pangkalibutanon. Bisan pa nagapabilin ang problema sang internal security, mapilitan ang mersenaryong AFP nga mag-asikaso sang external security threat sa pagsabat sang kagustuhan sang Estados Unidos.

Samtang nagaluntad ang gyera sibil sa pungsod, nagaluntad man ang rebolusyonaryong gahum sang pumuluyo sa kaumahan batok sa gobyerno sang reaksyon. Samtang nagasinggit sang katarungan kag hustisya ang pigos nga Negrosanon, magapadayon man ang pag-andar kag proseso sang rebolusyonaryong hustisya sang rebolusyonaryong gobyerno sang pumuluyo sa kaumahan batok sa manugpigos kag mahimuslanon.

Kon ang reblusyonaryonaryong kahublagan paagi sa NPA ang nagapatuman sa pagsilot sa mga espiya sang estado kag iban pa nga mga kriminal kag malain nga elemento gikan sa proseso sang rebolusyonaryong korte sang pumuluyo kag gina-ako ini sa publiko, ang AFP kag PNP ang nagahimo sang lapnagon nga mga ekstrahudisyal nga pagpamatay kag wala gina-ako kag hinabunan pa sa modus sang peke nga engkwentro.

Ang LPC-NPA nagapanawagan sa tanan nga indi gid magpa-into kag magpagamit sa AFP, PNP kag NTF-Elcac sa ginalunsar nga kontra-rebolusyon nga kampanya. Magpangabuhi sang insakto nga wala nagalapak sa kinamatarung sang pumuluyo kag rebolusyon. Sa aktwal, ang militar ang wala naga-ako kag indi makadepensa sa mga nagtraydor sa rebolusyon sa tanan nga oras. Ang NPA ang magasukot sa mga may utang nga dugo sa pumuluyo kag rebolusyon matapos nga mapamatud-an sa korte sang pumuluyo. ###

Iresponsable kag Malisyoso nga Pahayag ni Capt. Judesses Catalogo sang NOCPPO, Ginakondenar sang LPC-NPA

Mayo 13, 2024

Ka JB Regalado
Spokesperson
Leonardo Panaligan Command
New People’s Army
Central Negros Guerrilla Front

Mabaskog nga ginakondenar sang Leonardo Panaligan Command-New People’s Army (LPC-NPA) ang iresponsable kag malisyuso nga palayag ni Capt. Judesses Catalogo, Negros Occidental Provincial Police Office (NOCPPO) spokesperson. Wala huya si Catalogo nga maghambal sa media outlets nga NPA ang nagtiro-patay kay Barangay Kagawad Reynaldo “Jimmy” Jacolbe sang Barangay Puso, La Castellana sadtong Mayo 1 sang gab-i sa pihak sang opisyal nga pahayag sang LPC-NPA sa pagkondenar sa may kahimuan sang sini nga krimen. Daw baliskaron pa ni Catalogo kag ipahid sa NPA ang makasiligni nga pagpatay sa opisyal sang barangay. Gusto lang hinabunan ni Catalogo ang tuman ka law-law nga imbestigasyon sang Philippine National Police (PNP)-La Castellana kag amu man ang NOCPPO. Kaangay lang nga nagapanghugas-kamot si Catalogo kaangot sa nasambit nga krimen. Kinahanglan pa ni Catalogo ang pagbasa-basa sa “putos sang ibos” antis magtaghol bilang tagpamaba sang NOCPPO.

Ang matuod, sa inisyal nga imbestigasyon sang LPC-NPA, isa sa mga perpetrators sa pagpatay kay Barangay Kagawad Reynaldo “Jimmy” Jacolbe ang isa man sa mga PNP-Intelligence Assets sang PNP-Binalbagan. Kag såa subong, padayon pa ang paghimo sang verifications kag pagpadalum sang imbestigasyon kaangot sa motibo sang krimen.

Lubos man nga ginaabi-abi sang LPC-NPA ang separado nga imbestigasyon sang Commission on Human Rights (CHR)-Negros kaangot sa mga hitabo. Bukas gid ang teritoryo sang NPA sa Central Negros para sa fair and square nga imbestigasyon sang CHR-Negros. Ini nga lihok sang CHR-Negros, ginakabig nga isa ka “good development” para sa pamilya sang mga biktima sang extra-judicial-killings nga ginkomiter sang Armed Forces of the Philippines (AFP), PNP kag iban pa nga state forces nga nagapabilin unsolved tubtob subong. Kaangay sang mga masunod nga hinimoan sang 62nd IB:

1. Pagmasaker sa pamilya Ramirez sa Sityo Napiluan, Barangay Quintin Remo, Moises Padilla, Negros Occidental sadtong Mayo 20, 2023.

2. Pagpatay  kay Jose “Jojo” Albores sang Sityo Tiyos, Barangay Quintin Remo, Moises Padilla sadtong Mayo 2023.

3. Pagpatay sang kumbinado nga pwersa sang 62nd IB kag 2nd NOPMFCOY-PNP kay Marlon Catacio sang Sityo Ngalan, Brgy Quintin Remo, Moises Padilla.

4. Brutal nga pagpatay sanday Bernard Torres kag Dionesio “Boy” Baloy sa Hda Gomez, Barangay Sag-ang, La Castellana, Negros Occidental.

5. Pagpatay kay Braulio Tubalado sang Sityo Karanawan, Barangay Amontay, Binalbagan, Negros Occidental sadtong Disyembre 2023.

6. Pagmasaker sa pamilya Jacolbe diin patay si Cristina Jacolbe-Day Care Worker kag 16anyos nga si Every Kee Jacolbe-estudyante nga anak ni Cristina sadtong 2022.

Ginasigahum sang LPC-NPA sa CHR-Negros nga mahatag ang nagakaigo nga hustisya sa pamilya sang mga biktima sang kalakasan sang mga pwersa sang estado nga AFP, PNP kag iban pa nga makinaryas sang reaksyonaryong estado. Pasabton kag pabayaron sandig sa kabug-aton sang kaso nga ila nakomiter batok sa pumuluyong Negrosanon.###

#TroopAlert | 62nd IB Padayon nga Nagabayolar sa CARHRIHL sa Central Negros

Mayo 13, 2024

Halos 150 ka tropa sang 62nd IB ang padayon nagapanglusob sa mga komunidad sang mangunguma sa Guihulngan City kag Canlaon sang Negros Oriental kag sa Barangay Macagahay, Moises Padilla, Negros Occidental. Nagalapas sa Comprehensive Agreement on Respect for Human Rights and International Humanitarian Law (CARHRIHL) kaangay sa pilit nga pagtiner sa mga kabalayan kag pagkampo sa mga barangay hall.

Halin Mayo 11 tubtob subong Mayo 13, ginahimo kampo militar sang platun nga tropa sang 62nd IB ang barangay hall sang Barangay Calupaan, Guihulngan City. Nagalapta sang ila mga higko kag basura sa nasambit nga barangay hall. Samtang nagadisturbo man ini sa normal nga daloy sang adlaw-adlaw nga transaksyon sang barangay sa paghatag sang serbisyo sa pumuluyo sa baryo.

Samtang gikan Mayo 12 hasta subong Mayo 13-nagtiner ang halos 60 ka tropa sang 62nd IB sa nga panimalay sang mangunguma sa sityo sang Banderahan, Barangay Trinidad, Guihulngan City kag mga sityo sang Tubod kag Tagbak tanan sang Barangay Macagahay, Moises Padilla. Pilit nga ginasaka kag ginatineran ang mga panimalay sang mangunguma sa pihak sang ila pagdumili. Nagtuga sang kahadlok sa nasambit nga mga pamilya lakip na sa magagmay nga kabataan.

Mayo 12-13, makit-an man ang duha ka kolum sang militar sa Sityo Malatanglad, Barangay Budlasan, Canlaon City. Nagapanaka-saka man sa mga panimalay.

#62ndIBerdugo
#AFPerwisyo
#LayasPasistaMilitar

Reference:
Ka JB Regalado
Tagpamaba
Leonardo Panaligan Command-New People’s Army
Central Negros Guerrilla Front

Rapist sa La Castellana, Ginsilotan sang LPC-NPA

Mayo 10, 2024

Ka JB Regalado
Tagpamaba
Leonardo Panaligan Command-
New People’s Army
Central Negros Guerrilla Front

Ang Leonardo Panaligan Command-New People’s Army (LPC-NPA) ang nagpatuman sang silot-kamatayon kay Arman Binalo-ac, 38 anyos, may asawa kag mga kabataan sang Sityo Naube, Barangay Puso, La Castellana, Negros Occidental, alas 7:30 sang gab-i, Mayo 9.

Bangud sensitibo kag pinamilya ang kinaiya sang kaso, tuig 2005 napending sa korte sang pumuluyo ang ginpasaka nga kaso sa akusado. Tuig 2012-2014, ginpaninguhaan pa sang NPA nga maistorya si Arman kabahin sa ginpasaka nga kaso sa iya, apang wala gid ini nag-angkon sa pihak sang mga ebidensya gikan sa mga biktima kag mga witness.

Tungod man sang mga sirkumstansya sang seguridad nga indi gid mapaiway, nagpabilin ang nasambit nga kaso korte sang pumuluyo tubtob 2023. Ginreview ang kaso paagi sa pag-recall sang mga ebidensya, importante nga mga datus subongman ang mga mitigating and aggravating circumstances kag na-establisar kriminal nga kaso sang pagpanglugos paagi sa liwat pagtukod sang people’s court. Ini nga hukmanan ang ginakomposar sang nine-man-committee diin ara presiding judge, prosecution kag depensa bilang nagatindog nga mga hurado kag ginhimo ang pagbista sining 2024.

Ginpahamtang ang silot-kamatayon sang LPC-NPA kay Binalo-ac, matapos nga napamatud-an sang rebolusyonaryong korte sang pumuluyo nga siya ang responsable nga naglugos sa iya mga himata sadtong tuig 1998-1999. Si Arman ang nagapangatubang sa rebolusyonaryong kahublagan sang two counts of attempted rape kag one count of rape.
Gani ang rebolusyonaryong hustisya ang nagahulag kag ang malaba nga kamot sini paagi sa NPA ang indi man magduha-duha sa pagsilot sandig sa kabug-aton sang kaso nga inyo nakomiter.

Sa tanan nga may mga kaso nga gina-atubang sa pumuluyo kag rebolusyon, indi gid pagsundon ang malaswa nga gawi ni Arman Binalo-ac. Bukas ang malapit nga mga talatapan sang CPP-NPA sa inyo tampad nga pagbag-o. ###

#TroopAlert | 62nd IB Nagapanglusob sa mga Komunidad sang Mangunguma sa Central Negros

Mayo 9, 2024

Kapin sa 200 ka tropa sang 62nd IB ang kaangay sang mga idu-buang nga nagalambiyong kag nagapanglusob sa mga komunidad sang mangunguma sa Central Negros gikan pa sadtong Mayo 6 sang gab-i tubtob subong nga adlaw Mayo 9, 2024. Makit-an ang mga ini sa mga barangay sang Moises Padilla sang Negros Occidental kag Guihulngan City, Negros Oriental.

Naglab-ot sa lima ka kolum sang pasistang tropa ang nahisayran sang mga pumuluyo sa Barangay Quintin Remo, Moises Padilla halin sadtong Mayo 7 sang gab-i hasta pa subong nga oras sang Mayo 9. Ginlusob sang militar ang mga sityo sang Binataan, Oway-oway, Tibubong kag Tiyos sang nasambit nga barangay. Samtang may kolum man sang militar nga makit-an sa Sityo Cuyawyaw sang Barangay Inolingan, Moises Padilla.

Sini lang nga aga, Mayo 9-may kolum man sang 62nd IB nga nagapanaka-saka sa mga kabalayan sang Sityo Tagbak, Barangay Macagahay sakop man sang Moises Padilla.

Sa Guihulngan City: sa sityo sang Punong, Barangay Trinidad-halin pa Mayo 6 tubtob karun nga adlaw Mayo 9, nagapabilin ang presensya militar sa lugar. Samtang may kolum man sang AFP nga makit-an sa Sityo Maluy-a, Barangay Sandayao, Guihulngan City.

#62ndIBerdugo
#AFP-PNPerwisyo
#LayasPasistangMilitar

Reference:
Ka JB Regalado
Spokesperson
Leonardo Panaligan Command-New People’s Army
Central Negros Guerrilla Front

Pagpatay kay Brgy. Kagawad Reynaldo Jacolbe sa La Castellana, Ginakondenar sang LPC-NPA

Mayo 3, 2024

Ka JB Regalado
Spokesperson
Leonardo Panaligan Command
New People’s Army
Central Negros Guerrilla Front

Wala kahilabtanan ang Leonardo Panaligan Command-New People’s Army (LPC-NPA) sa brutal nga pagtiro-patay kay Brgy. Kagawad Reynaldo Jacolbe sang Brgy Puso, La Castellana, Negros Occidental sadtong Mayo 1,  pasado alas 8:00 sang gab-i.

Sa inisyal nga pagpangusisa sang rebolusyonaryong kahublagan sa lugar kaangot sa makasiligni nga hitabo, may na-istablisar na ang NPA nga mga motibo kag suspects sa sini nga krimen base sa kondukta sa pagpatay kag nga recoveries. Apang nagakinahanglan pa sang dugang kag maid-id nga imbestigasyon kag himuon ang madasig nga pagproseso sa rebolusyonaryong korte sang pumuluyo.

Kaangot sini, mabaskog gid nga ginapakamalaot sang LPC-NPA ang wala kaluoy nga pagpatay kay Brgy. Kagawad Reynaldo “Jimmy” Jacolbe. Samtang ginapaabot man sang LPC-NPA ang rebolusyonaryong simpatiya sa kasubo sang mga himata kag suod nga mga abyan sang pamilya Jacolbe.

Ginpanawagan man sang LPC-NPA sa may kahimuan sa sini nga krimen nga tampad nga magsumiter na sang inyo kaugalingon sa malapit nga yunit sang CPP-NPA sa madali nga panahon agud atubangon ang inyo mga kaso. Ang NPA indi gid magduha-duha sa pagsilot sa inyo katumbas man sa kabug-aton sang kaso nga inyo nagkomiter matapos nga mapamatud-an sang korte sang pumuluyo.###

Masupog nga AFP Asset sa Binalbagan, Ginsilotan sang LPC-NPA

Abril 30, 2024

Ka JB Regalado
Tagpamaba
Leonardo Panaligan Command -New People’s Army
Central Negros Guerrilla Front

Sa pihak sang lapnagon nga operasyon militar sa Central Negros, madinalag-on nga ginpatuman sang Leonardo Panaligan Command-New People’s Army (LPC-NPA) ang silot-kamatayon kay Ritoy Pedro sa Sityo Kamanggahan, Barangay Amontay, Binalbagan, Negros Occidental, Abril 28, alas 10:40 sang gab-i.

Si Pedro ang masupog nga nagapaniktik sa mga aktibidad sang rebolusyonaryong kahublagan sa lugar. Masami nga naggiya sa mga operasyon sang Philippine National Police (PNP) kag Armed Forces of the Philippines (AFP) ilabi na sang kumbinado nga pwersa sang 94th kag 62nd IB sa mga boundary sang Isabela, Binalbagan sa Negros Occidental, kag Jimalalud kag La Libertad sa Negros Oriental.

Sa kongkreto, si Ritoy Pedro ang napamatud-an nga naggiya sa operasyon sang 62nd kag 94th IB nga tuyo mag-reyd sa yunit sang NPA sa Barangay Amontay, Binalbagan, sadtong Pebrero 12, 2023. Siya man ang nangunang naggiya sa paglusob sa mga puluy-an sang mga mangunguma sa Sityo Nabirasan, sa amo gihapon nga barangay ilabi na sa puluy-an sang pamilya Lindayao. Wala kaluoy nga ginkastigo kag ginpahug nga patyon sang pasistang tropa si Jelman Lindayao sadtong Pebrero 14, 2023. Si Jelman ang gintandi-an sang sanggot sa liog atubang sang iya asawa kag mga kabataan samtang gina-interogar.

Sa ginsiling na, ang asud-asod nga mga aksyon militar sang LPC-NPA ang magserbe nga mabaskog nga paandam sa mga may mabug-at nga salabton sa pumuluyo kag rebolusyon. Bisan pa man, sa gihapon bukas sa tanan nga oras ang malapit nga talatapan sang CPP-NPA sa pag-atubang sa inyo para sa inyo nga pagbag-o matapos ang tampad nga pagsumiter sang inyo kaugalingon sa rebolusyonaryong korte sang pumuluyo agud sabton kag atubangon ang inyo kaso nga nakomiter.###

#TroopAlert | 250-300 nga Pasistang Tropa sang 62nd IB Nagalambiyong sa mga Komunidad sang Mangunguma sa Central Negros

Abril 26, 2024

Kahapon, Abril 25, alas 3:00 sang hapon- namutikan ang apat ka kolum sang 62nd IB sa boundary sang Vallehermoso kag Guihulngan City tanan sang Negros Oriental. Makit-an ang duha ka kolum sang militar sa Sityo Camonsil, Barangay Hibaiyo kag duha man ka kolum sa mga sityo sang Binakayan kag Bay-ang, tanan sang Barangay Tabon, Vallehermoso.

Kagab-i, Abril 25, may nag-abot man nga tropa militar sa Dityo Mabato, Barangay Talaon, La Libertad, Negros Oriental.

Samtang mentinado ang apat ka kolum sa La Carlota kag La Castellana sa Negros Occidental. Namutikan nga nagapanaka-saka sa mga kabalayan sa mga sityo sang Linggahub kag Mercedes sang Barangay Sag-ang, La Castellana kag Sityo Nailab, Brgy Ara-al subong man sa Sityo Bai’s, Barangay Yubo, La Carlota. Halin pa sadtong Abril 22 ang nasambit nga tropa sa lugar.

Mentinado man ang apat ka kolum sang 62nd sa Sityo Cuyawyaw, Barangay Inolingan kag kasikbit nga mga sityo sang Barangay Quintin Remo tanan sang Moises Padilla, Negros Occidental halin pa Abril 24 tubtob subong nga adlaw Abril 26.

Sadtong Abril 17, walo nga nakasibilyan nga tropa sang 62nd IB apang armado sang matag-as nga kalibre sang armas ang nagapanaka-saka sa mga kabalayan sa Sityo Libas, Barangay Imelda, Guihulngan City, Negros Oriental. Pilit nga ginapareport ang mga residente sa 62nd IBPA Bravo Company nga nahamtang sa Brgy Sikatuna, Isabela, Negros Occidental. Kadungan sini may kasubong man nga pito ka tropa militar nga nakasibilyan apang armado sang M16 ang nagapanaka-saka man sa mga kabalayan sang mangunguma sa Sityo Binataan, Brgy Quintin Remo, Moises Padilla.

#62ndIBerdugoDesperado
#AFP-PNPerwisyo
#LayasPasistangMilitar

Reference:
Ka JB Regalado
Spokesperson
Leonardo Panaligan Command-New People’s Army
Central Negros Guerrilla Front

Masupog nga Intel Asset sang 62nd IB sa Moises Padilla, Ginsilotan

Abril 26, 2024

Ka JB Regalado
Spokesperson
Leonardo Panaligan Command
New People’s Army
Central Negros Guerrilla Front

Tampad nga gina-angkon sang Leonardo Panaligan Command-New People’s Army (LPC-NPA) ang madinalag-on nga pagpatuman sang silot-kamatayon kay Tongkai Golez sang Sityo Cuyawyaw, Barangay Inolingan, Moises Padilla, Negros Occidental alas 7:30 sang gab-i, Abril 24.

Si Golez ang ginpamabatbatan sang silot-kamatayon sadtong Oktubre 2023, matapos napamatud-an sang rebolusyonaryong korte sang pumuluyo nga masupog nga intel asset sang 62nd IB kag may utang nga dugo sa pumuluyo kag bug-os nga rebolusyonaryong kahublagan sa Central Negros.

Si Tongkai ang masupog nga nagapaniktik sa hulag kag aktibidad sang NPA sa lugar kabaylo sang kwarta nga pabuya halin sa pasistang 62nd IB. Siya ang naggiya sa operasyon sang 62nd IB nga nagreyd sa yunit sang NPA sa Sityo Napiluan, Barangay Quintin Remo, Moises Padilla sadtong Mayo 20, 2023 nga nagresulta sang kamatayon sang mga sibilyan nga sanday Juliven Ramirez kag Evelyn Meren (mag-asawa) kag Ruben Obidas sang nasambit nga lugar. Samtang patay man sadto sila Julwar “Ka Ryan” Loviano kag Alvin “Ka Dagger” Bayno, mga isganan nga Pulang hangaway sang banwa.

Ini ang kongkreto nga sabat sang CPP-NPA sa ginapangayo nga hustisya sang mga pamilya nga biktima sang pasismo kag terorismo sang estado batok sa pumuluyo kag bug-os nga rebolusyonaryong kahublagan. Magserbe man ini nga mabaskog nga paandam sa tanan nga may salabton kag may utang nga dugo sa pumuluyo kag rebolusyon.

Madumduman, sang nagligad nga Abril 11 ginpatuman man sang LPC-NPA ang pagsilot sang kamatayon kay Danny Boy Bartolome sang Sityo Paho, Barangay Camandag, La Castellana, Negros Occidental.

Ginamanduan ang tanan nga yunit sang LPC-NPA nga maglunsar sang lapnagon nga mga qtaktikal nga opensiba. Pabayaron ang napamatud-an na sang korte sang pumuluyo nga may mga salabton nga grupo, indibidwal labi na ang berdugong AFP-PNP kag iban pa nga mersenaryong makinaryas sang estado.###