Sekreto nga intel asset sang AFP, ginsilutan sang ASJC-NPA

May 6, 2024

Ka Andrea Guerrero
Tagpamaba
Armando Sumayang Jr Command-New People’s Army
Southwest Negros Guerrilla Front

Ginsilutan sang isa ka yunit sang Armando Sumayang Jr. Command-New People’s Army (ASJC-NPA) ang sekreto nga intel asset sang Armed Forces of thee Philippines (AFP) nga si Donie Baculi sa Sityo Baktolon, Barangay Camindangan, Sipalay City sadtong Mayo 3, 2024 ala 7:30 sang gab-e.

Si Baculi, isa ka hepe sang tanod sa nasambit nga barangay kag sekreto nga nagapanilag sa rebolusyonaryo nga kahublagan. May angot si Baculi sa AFP kag masupog nga gintahasan nga maniktik sa pumuluyo kag sa hulag sang mga NPA sa lugar. Nangin prente sang iya paniktik ang pagpanglibod sang isda sa bilog nga lugar agud makalab-ot sa mas malapad nga erya nga mapanilagan. Miyembro man si Baculi sang Peace Maker, isa man ka kontra-rebolusyonaryo nga organisasyon nga gintukod mismo sang AFP-PNP. Lawig na nga ginpanilagan sang NPA ang kontra-rebolusyonaryo kag kontra-pumuluyo nga hulag ni Baculi.

Sa idalum sang International nga Laye sang Gyera, isa ka lehitimo nga target si Baculi sa rebolusyonaryo nga kahublagan. Ginpanawagan man namon sa tanan nga mga espiya kag asset sang reaksyonaryo nga gobyerno nga mag-halin sa sina nga trabaho kag mangin kabahin sa produktibo nga mga pwersa sang sosyedad. Gina-engganyo man naton ang tanan nga mga narekrut sang AFP-PNP nga mangin local asset nga magsurender sa pinakamalapit nga yunit sang NPA.

Sa pagpatuman sang operasyon, nakumpiska sang ASJC-NPA ang isa ka .45 calibre nga pistola, mga bala, radio handset, handcuff kag mga personal nga I.D. ###

Espiya kag asset sang AFP sa Sipalay City, ginsilotan sang NPA

Abril 25, 2024

Ka Andrea Guerrero
Tagpamaba
Armando Sumayang Jr Command-New People’s Army
Southwest Negros Guerrilla Front

Hustisya ang naangkon sang pumuluyo sang ginpatuman sang isa ka yunit sang Armando Sumayang Jr Command-New People’s Army (ASJC-NPA) ang silot kamatayon kay Jun Habagat sa Sityo Cagay 2, Barangay Camindangan, Sipalay City, Negros Occidental sadtong Abril 24, 2024 alas 9:00 sang gab-i.

Determinado nga ginpatuman sang yunit sang ASJC-NPA ang silot kamatayon bangud sa malawig na nga panahon nga ginareklamo sang pumuluyo ang pagpaniktik ni Habagat sa hulag sang rebolusyonaryong kahublagan kag NPA sa lugar kag direkta nga naga-report sa detachment sa Barangay Camindangan (Bactolon) sa amo nga syudad. Katapuan si Habagat sang Sitio Intelligence Network (SIN) nga ginatanom sang Armed Forces of the Philippines (AFP) agud magaserbe nga ila mata kag dalunggan.

Magluwas sa pagkasupog nga intel kag asset sang AFP, isa man si Habagat sa nagapalapta sang drugas sa nasambit nga sityo kahimbon man ang mga tropa sang AFP nga nagapirmi sa lugar. Lakip ang mga kabataan nga nangin biktima sang paggamit sang shabu. Sila Habagat kag mga militar mismo ang nagapanguna sa pagpalapta sang drogas, pornograpiya kag iban pa nga burges nga kultura nga nagserbe nga hilo sa pamensaron sang pumuluyo.

Indi kaangay nga sundon ang mga gawi ni Jun Habagat.

Ginapanawagan naton sa iban pa nga mga espiya, intel, mga katapo sang Sitio Intelligence Network (SIN), Barangay Intelligence Network (BIN) kag iban pa nga mga grupo sang mga tropa sang AFP kag Philippine National Police (PNP) nga magtadlong na sa ila nga pagpangabuhi kag maghalin sa sina nga malain nga trabaho. Indi ina makatarunganon kag magatuga lamang sang kahalitan sa pangabuhian kag kabuhi sang pumuluyo.

Pagatinguhaan pa sang ASJC-NPA nga masilutan ang mga pinakamasupog nga elemento sang AFP kag PNP agud mapangapinan ang interes sang pumuluyo kag magpabilin ang kalinong sa lugar.###

Mabuhi si Rogelio Posadas! Panubli-on ang iya armas!

Abril 20, 2024

Ka Andrea Guerrero
Tagpamaba
Armando Sumayang Jr Command-New People’s Army
Southwest Negros Guerilla Front

Mapula kag hugot nga pagsaludo ang ginhatag sang Armando Jr Sumayang Command-New Peoples’s Army (ASJC-NPA) sa paghanduraw sa dungganon nga kabuhi ni Rogelio “Ka Cocoy” Posadas. Isa na ka tuig ang nagligad matapos nga ginsalbeyds siya sang mga berdugo nga 303rd Brigade sang Armed Fores of the Philippines (AFP) sadtong Abril 20, 2023 pasado alas-6:00 sang gab-i. Tubtub subong, nagpabilin nga desaparacido ang upod niya nga si Lyngrace Marturillas kag ang duha ka drayber sang habal-habal nga sila Renel delos Santos kag Denald Mialen. Upod sila nga nagbiyahe sa dalan sang Isabela-Hinigaran sang ginlambatan kag gin-abdak sa mga elemento sang 303rd IBde.

Ginpaantus kag gintortyur si Ka Cocoy antes gindala sa Sityo Cabite, Brgy. Santol, Binalbagan, Negros Occidental kag ginpaguwa nga napatay sa 10 ka minuto nga peke nga engkwentro sa tunga sang NPA kag mga tropa sang 62nd kag 94th IB.

Napanday sa tunga sang paghimakas

Si Rogelio Posadas, 62, naghalin sa isa ka pamilya sang manggaranon nga mangunguma sa Davao City. Ginpadala siya sa San Carlos Seminary sa Cebu agud mangin pari. Sang naglupok ang First Quarter Storm (FQS), nakigbahin si Ka Cocoy sa kontra pasista kag paghimakas kontra Martial law sang anay diktador Marcos Sr. Namuklat siya sang nakita ang pagpanghimulos kag pagpamigos sang nagahari nga sahi sang naglubog siya sa mga komunidad sang imol nga taga syudad, mga mangunguma kag mga mamumugon. Ini ang nagtulod kay Ka Cocoy nga mangin organisador sa Central Visayas kag nagbulig pundar sa rebolusyonaryo nga kahublagan sa rehiyon. Panahon sang pagsipak sang 1980, hugot siya nga nanindugan sa pagkamakatarungan sa rebolusyon kag sa kahustuhon sa taktika sang pangmalawigon nga inaway banwa paagi sa palibutan ang kasyudaran halin sa kaumhan. Nadeploy siya sa isla sang Negros sang 1998, kag nakabulig pundar kag pagpalapta sa kalayo sang rebolusyon sa bilog nga isla.

Sang ulihi nga bahin sang iya kabuhi, epektibo nga napamunuan niya ang rebolusyonaryo nga kahublagan sa bilog nga isla sang Negros bilang sekretaryo sang Komiteng Rehiyunal sa Partido sa Isla sang Negros (KRPIN). Gintinguhaan niya nga mapamunuan ang KRPIN sa pag-atubang sang all-out war sang rehimen US-Marcos Jr kag Duterte. Maisugon kag matutom niya nga ginpatuman ang mga katungdanan sa rebolusyon kag ginatun-an ang Marxismo-Leninismo-Maosimo agud maaplikar ini sa kongkreto nga kahimtangan diri sa isla sang Negros.

US-Marcos Jr kag Duterte: utok sang terorismo

Halin sang rehimen Duterte tubtub sa subong nga rehimen US-Marcos Jr, wala nauntat ang kontra rebolusyonaryo nga kampanya kag kapintas sa pumuluyo bangud sang ila desperasyon nga tapuson na ang insurhensiya sa bilog pungsod. Ginpatuman ni Duterte ang Executive Order 70 kag Memorandum Order no. 32 nga nagpaidalum sa bilog nga pungsod sa de facto Martial Law kag nagbun-ag sa National Task Force to End Local Communist Armed Conflict (NTF-Elcac). Ginpadayon man ini sa pagpungko sa poder ni Marcos Jr. Linibo na ang nangin biktima sang pagpamatay, pagpang-abdak, pagpangharas ,pagpamahog, pagpangastigo kag madamo pa nga mga brutal nga krimen ang nakomiter sang AFP, Philippine National Police (PNP) kag NTF-Elcac. Sa mga mata sang reaksyonaryo nga estado, ginatulok nila nga daw mga sapat ang pumuluyo nga hapos lang nga ginpamatay kag ipaguwa nga mga katapo sang NPA sang ila serye nga mga peke nga engkwentro. Biktima man si Ka Cocoy sa sapatnon nga pagpatay sang mga hors de combat kaangay sang natabo nila Ka Ericson Acosta, Ka Romeo Nanta, Ka Kerima Lorena Tariman, Ka Marilyn Badayos, Ka Florida Ceballos kag madamo pa nga iban. Indi man luwas ang mga sibilyan ilabi na ang mga mangunguma sa pasismo sang reaksyonaryong estado agud pahiposon kag paluhuron sa paghari sang pasistang US-Marcos Jr nga rehimen.

Pasingkion kag ilapta ang inaway banwa

Sa aton pagdumdum sa pagkapatay ni Rogelio Posadas, padayon naton nga ipanawagan ang hustisya sa tanan nga mga biktima sang pasismo sang reaksyonaryo nga estado paagi sa pagpasingki sang inaway banwa diri sa isla sang Negros. Manalaytay sa kaugatan sang tanan nga kadre sang Partido, Pulang hangaway kag sa bilog pumuluyo ang rebolusyonaryo nga kapagsik kag optimismo ni Ka Cocoy. Pagauyatan sang bilog nga rebolusyonaryo nga kahublagan ang mga ginpanubli nga armas ni Ka Cocoy agud mapalapta pa ang kalayo sang rebolusyon. Mangin suga ang iya kabuhi kag kasaysayan sa pag-uswag sang rebolusyon tubtub sa kadalag-an. ###

#TroopAlert | Militarisasyon sa banwa sang Cauayan nagapadayon

Abril 8, 2024

Halin sa bulan sang Pebrero tubtob subong, wala untat ang militarisayon paagi sa nagapadayon nga operasyon militar sang mga tropa sang 15th IB sa mga barangay sang Yao-yao, Caliling, Camalandaan, Inayawan, tanan sakop sang Cauayan, Negros Occidental.

Ginsaka sa nasambit nga militar ang balay ni Arman Dolentina kag gin-ukay ang ila mga kagamitan kagahapon, Abril 7, sa Sityo Kanagbaan, Inayawan, Cauayan.  Ginpahug man sang mga soldado ang iya bata nga onse ka tuig.

Reference:
Ka Andrea Guerrero 
Tagpamaba
Armando Sumayang Jr Command-New People’s Army
Southweest Negros Guerrilla Front

Itib-ong ang pungsodnon demokratiko nga rebolusyon! Paigrabon ang kalayo sang inaway banwa!

Ka Andrea Guerrero
Tagpamaba
Armando Sumayang Jr Command-New People’s Army
Southwest Negros Guerrilla Front
Marso 29, 2024

Ang Armando Sumayang Jr. Command-New Peoples Army (ASJC-NPA) nagapaambit sang amon malipayon kag militante nga pagsaludo sa tanan nga mga Pulang Kumander kag hangaway, mga kadre sang Partido, kag sa tanan nga mga rebolusyonaryo nga pwersa ilabi na diri sa Sur nga bahin sa isla sang Negros sang aton ika-55 nga pagsukat sang NPA. Ginahatagan man naton sang pasidungog ang tanan nga mga rebolusyonaryong martir, partikular sa ila Chenee Dacalos (Ka Nikki),Jeren Vargas (Ka Alvin), Ka Rickoy (Bobby Pedro), Ka Goring (Mario Mullon), Ka Bombo (Alejo delos Reyes) kag Ka Diane (Melissa dela Peña), nga naghalad sang ila kabuhi agud mahawanan ang banas sang rebolusyon.

Malipayon kag mapagsik naton nga gina abi-abi ang panawagan sang Partido Komunista sang Pilipinas (PKP) nga manadlong kag pabakuron ang tanan nga rebolusyonaryo nga pwersa agud mapangibabawan ang mga kasaypanan kag kahuyangan sa tanan nga patag sang rebolusyonaryo nga hilikuton. Isa ini ka malahalon nga tikang agud mapasaka naton ang lebel sang aton inaway banwa sa mas mataas pa nga halintang.

Subong nga todo larga ang pagduso sang rehimen ni US-Marcos Jr. sang mga neoliberal nga mga polisiya sa ekonomiya, labi nga nagatambok ang duta sa Sur sang Negros para sa rebolusyon. Ginpasulod sang reaksyonaryo nga gobyerno ang pagpatanum sang palm oil kag ang liwat nga pagbuhi sa mga minahan, pabor sa mga interes sang dumuluong kag mga dalagko kumprador burgesya.  Lapnagon man ang kawad-on sang palangabuhian, pagpang-agaw sang duta paagi sa National Greening Program (NGP) kag Integrated Forest Management Agreement (IFMA), nubo nga sweldo kag benepisyo, pagmina, demolisyon, kag relokasyon sa higad baybay nga nagpahalin sa ginatos ka mga mangingisda nga lubos nga nagapaantos sa mga pumuluyo.

Sa bilog probinsya sang Negros Occidental, ang ika-6 nga distrito ang isa sa natam-an sang grabe nga tig-ilinit bangud sa El Niño.  Ginpalala pa ini sa pabaya kag korap nga reaksyonaryo nga rehimen US-Marcos II nga wala sang ginhatag nga nagakaigo nga sabat sa kahalitan nga gintuga sang El Niño. Amo ini ang isa sa mga kabangdanan nga indi malikawan sang mga pumuluyo nga magduso sa tanan nga porma sang paghimakas armado man ukon ligal.

Magabato ang hukbo kag pumuluyo. Nakaagum man kita sang mga kapaslawan kag kahuyangan sang nagligad nga mga tuig sandig sang aton nga pagtasa, apang sa pihak nga bahin, nagmadinalag-on kita subong sa pagpalapad kag nakakonsolida sang aton nga mga pwersa bisan sa malapnagon nga mga operasyon kombat sang Armed Forces Of he Philippine (AFP) kag Philippine National Police (PNP). Paagi sang aton pag-uyat sang mga sandigan nga prinsipyo kag taktika sang pagpakig-away gerilya, mahimo naton nga mapasumbag sa hangin ang kaaway kag mapabilin sila nga bulag kag bungol. Ini nagapamatuod nga ang NPA hugot nga nakaugat sa malapad nga masang ginapigos kag ginahimuslan. Superyor man ang kaaway sa kagamitan militar, apang ina nga superyoridad ginahimun-an sa wala-tupong nga pagsuporta sang malapad nga masa sang pumuluyo sa NPA, ang ila matuod nga hangaway. Paagi sang aton hugot nga paghiliusa, liwat naton nga mapapagsik ang aton rebolusyonaryo nga makina.

Ang ASJC-NPA tampad kag bug-os tagipusu-on nga pas-anon ang mabug-at kag hinanali nga mga tahas sang agraryo nga rebolusyon, pagpalapad sang baseng masa kag pagpapagsik sang armado nga paghimakas. Padayon kami nga magbalik-tuon sa mga sandigan nga prinsipyo kag teorya sang Marxismo-Lenimismo-Maoismo agud husto nga madapat ang mga taktika kag pamaagi sa paglunsad sang inaway gerilya agud lubos pa nga maalagaran ang masa. ###

#HRVAlert | 15Th IB, nangastigo kag namahug sa mga mangunguma sa banwa sang Cauayan

Marso 19, 2024

Mabaskog nga ginakundenar sang Armando Sumayang Jr. Command – New Peoples Army (ASJC-NPA) ang pagpamintas sang mga pasista nga tropa sang 15th IB sang Armed Forces of the Philippines (AFP). Mga pilas kag bun-og sa kalawasan ang naaguman sang tatlo ka mangunguma sa Sityo Bonbon, Inayawan, Cauayan, Negros Occidental sadtong Marso 9, 2024. Ginkastigo sila Romy Gallo, Romeo Gallo, kag Dondon Jamaybay sa mga naga operasyon nga tropa sang 15th IB. Ginpahug nga patyon sa nasambit nga mga berdugo nga tropa si Dondon Alesasis sadtong Marso 13, 2024 sa Sityo Kalapnisan sa pareho nga barangay.

Halin sadtong bulan åsa Enero 2024, wala gin-untatan sang mga tropa sang AFP ang militarisasyon sa banwa sang Cauayan. Naglab-ot sa masobra 10 ka mga sityo ang ila gintiniran sulod sa bulan sang Marso sa tabon sang Retoold Community Support Program (RCSP). Wala huya man sila nga nagpalapnag sang mga poster nga nagpakamalaot kag nagpasibangud sa NPA sa kinagamo sa lugar. Indi ang NPA ang kabangdanan sa kakugmat kag kahadlok nga nabatyagan sang mga pumuluyo kundi mismo ang AFP-Philippine National Police (PNP) ang ara sa likod sini.

Kapid ang kinagamo kag dugang nga paantus sa masang mangunguma ang mga naka pokus nga operasyon sang mga berdugo nga tropa. Dapat nga pasabton ang 15th IB sa ila mga krimen sang pumuluyo!
AFP, layas sa kaumhan! ###

Reference:
Ka Andrea Guerrero
Tagpamaba
Armado Sumayang Jr Command-New People’s Army
Southwest Negros Guerrilla Front

Pagbaha sang mga tropa sang AFP sa tunga sang El Niño, ginakundenar sang ASJC-NPA

Ka Andrea Guerrero
Tagpamaba
Armando Sumayang Jr Command-New People’s Army
Southwest Negros Guerrilla Front
Marso 14, 2024

Sa tunga sang mga nagalitik nga kadutaan kag nagakahubas nga katubigan, ginakundenar sang Armando Sumayang Jr Command-New People’s Army Southwest Negros Guerrilla Front (ASJC-NPA) ang wala untat nga pagbaha sang mga tropa sang Armed Forces of the Philippines (AFP) sa sur nga bahin sang Negros nga nangin tublag sa pagpangabuhi sang mga mangunguma. Masobra na isa ka tuig, sugod Enero 3, 2023, ang asud-asod nga mga focused military operation (FMO) kag Retooled Community Support Program (RCSP) sa bilog nga ika-anum nga distrito sang Negros Occidental nga nagsakop sa mga banwa sang Cauayan, Hinobaan, Ilog kag Candoni, kag mga syudad sang Kabankalan kag Sipalay.

Balangag ang pagdeklarar sang AFP nga ara na sa state of stable internal peace and security (SIPS) ang Negros Occidental. Sa sini pa lang nga una nga kwarto sang 2024, indi magnubo sa 10 ka barangay ang ginsakpan sang mga operasyon sang AFP partikular diri sa CHICKS area. Masobra 500 ka kombinado nga tropa sang 15th IB kag 47th IB sang AFP kag Special Action Force kag Regional Mobile Force sang Philippine National Police (PNP) ang nagpatigayon sang FMO sa pihak sang ila deklarasyon nga “dismantled” na ang larangan gerilya diri sa sur sang Negros.

Naglawig sang binulan kag tayuyon ang mga operasyon kombat. Nagtuga sang sablag kag kahalitan ang ini nga mga operasyon kombat sa kabuhi kag palangabuhian sang pumuluyo ilabi na sa mga mangunguma. Ginpaidalum sa 15th kag 47th IB ang pumuluyo sa curfew, paglog-book, pagpaniktik, pagpangransak, pagpamahug, patarasak nga pagpangtiro, pagpangbomba, pagpang-salbeyds kag iban pa. Nangin lapnagon ini bangud sa ila desperasyon nga tapuson na ang insurhensiya sa isla sang Negros.

Sang nagligad bulan Pebrero 2024, ginransak ang balay ni Marjie Campus sa mga tropa sang 15th IB sa Sityo Kantyang, Barangay Caliling kag nakuhaan sang mga personal nga kagamitan. Sang Pebrero 29, 2024, nagtuga sang kahadlok sa mga kabataan sang ginpalibutan sang nagaoperasyon nga mga soldado sa tunga sang gab-i ang balay ni Dodoy Himutra sa Purok 10 Talimagao, Brgy. Camindangan, Cauayan. Ila man nga ginpaidalum sa sarbeylans ang pumuluyo kag mga panimalay.

Nagapakuno-kuno ang mga tropa sang pasista nga AFP nga mga katapo sang NPA kag gintiplang ang masa agud makapangayo sang pagkaon. Ang mga operasyon kombat sang militar wala sang iban nga gintuga sa pumuluyo kundi kakugmat kag kahadlok.

Nagapabilin nga bulag kag bungol ang rehimen ni Marcos Jr sa pag-antus sang pumuluyo ilabi na sa tunga sang El Niño. Labi nga naapektohan sang grabe nga tig-init ang Sur nga bahin sang Negros kompara sa bilog nga Western Visayas. Nagapanguna nga nahalitan ang mga talamnan sa Kabankalan City nga nagabalor sang Php41.7 milyon, ginsundan sang Cauayan (Php14 milyon), Ilog (Php7.4 milyon), Hinobaan (Php2.5 milyon), kag Sipalay City (Php1.6 milyon). Naglab-ot man sa masobra Php157,000 ang halit sa mga kamaisan sa Sipalay City.

Ang halit nga dala sang El Niño dugang nga palas-anon sang mga mangunguma kapin pa sa pagpabaya sang reaksyonaryo nga gobyerno. Imbes nga ialokar ang pondo pakadto sa mga mangunguma, ginbutang mismo ni Marcos Jr ang Php250 bilyon nga pondo para sa dugang nga pagbakal sang mga bala kag bomba, kag para butaon ang mga bulsa sang iya mga heneral kag mga kroni samtang Php30 bilyon lang ang ginalokar para sa pagbulig sa milyon-milyon ka mga mangunguma. Indi pa segurado kon magtupa gid ini. Militarisasyon ang sabat sang rehimen Marcos Jr sa gilayon nga bulig nga kinahanglan sang mga masang mangunguma nga natam-an sa El Niño.

Ang ASJC-NPA puno sang determinasyon nga magpamuklat, mag-organisa, kag magpahulag sa malapad nga mga masa agud kolektibo maatubang ang kalamidad, mangita sang tubig kag magpalibog paano ini makalab-ot sa mga uma, mapasaka ang sweldo kag benepisyo sa mga mamumugon sa uma, pangapinan ang kinaiyahan batuk sa kapitalista nga pagpanghimulos, kag maduso ang ila demanda para sa gilayon nga ayuda.

Ginpakamalaot man sang rebolusyonarong pwersa sa southwest Negros ang mga proyekto nga palm oil plantation sang dalagko kumprador burges nga Isidro Consunji Jr kag burukrata kapitalista nga mga Araneta nga maga-epekto sa ginatos ka mga mangunguma sa banwa sang Candoni. Hugot man nga ginakundenar ang liwat nga pagsulod sang mga minahan sa Sipalay City.

Ang krisis naton sa klima gintuga mismo sang imperyalismo, pyudalismo kag burukrata kapitalismo. Indi masulbad ang aton gin-atubang nga mga krisis kun indi naton mabag-o ang sistema paagi sa armado nga pagrebolusyon.

Nagapanawagan ang ASJC-NPA sa tanan nga pumuluyo sa southwest Negros nga maghiliugyon agud atubangon ang krisis kag sukton ang rehimen Marcos Jr sa iya pagpabaya. ###

Linibu-libo nga pamatan-on ang manubli sa armas ni Hannah Jay “Ka Maya” Cesista! Hustisya para sa Bilar 5!

Kabataang Makabayan-Southwest Negros
March 13, 2024

Ang Kabataang Makabayan-Southwest Negros nagahatag sang amon pinakamataas nga pagsaludo kag pagpasidungog sa mga rebolusyonaryong martir ilabi na sa pareho namon nga pamatan-on, Hannah Jay “Ka Maya” Cesista, isa ka abogada nga gindakop-patay upod nila Domingo Compoc (Ka Laser), Albert Sancho (Ka Juaning), Parlito Segovia (Ka Aldrin), kag Marlon Omosura (Ka Darwin) sa Brgy. Campagao, Bilar, Bohol sadtong Pebrero 23, 2024.

Hugot namon nga ginakundenar ang pagmasaker sa Bilar 5. Wala sang kamatuoran kag dugang lang sa mga serye sang peke nga engkwentro ang ginpalapta sa mga nagapanguna nga “fake news peddler” sang Armed Forces of the Philippines (AFP) kag Philippine National Police (PNP). Nasaksihan mismo sang mga pumuluyo nga gindakop ang lima ka Pulang hangaway antes ginmasaker sa ila atubang agud magtanom sang kahadlok kag mapunggan ang masang mangunguma nga maghimakas para sa ila kinamatarung kag demokrasya.

Ang ginhimo sang mga berdugo nga AFP-PNP sa Bilar 5 wala sang kinatuhay sa mga pagpatay sa mga hors de combat diri sa isla sang Negros. Wala huya nga ginlapas sang militar kag kapulisan ang mga kasugtanan sa Geneva Conventions kag Comprehensive Agreement on Respect for Human Rights and International Humanitarian Law (CARHRIHL).

Indi sayang ang kabuhi nga ginhalad sang Bilar 5 kag sa linibu-libo nga martir sang rebolusyon. Nagakaangay nga sundon ang ila rebolusyonaryo nga banas ilabi na ni Ka Maya. Partikular nga kuhaan naton sang inspirasyon ang iya rebolusyonaryo nga diwa.

Bilang isa ka abogada, namuklat si Ka Maya sa lapnagon nga paglapas sa tawhanon kinamatarung, kag sang mga makasiligni nga mga krimen sang rehimen Marcos Jr paagi sa mga pasista nga mga ido-ido sang AFP-PNP sa kasyudaran man ukon sa kaumhan. Ini nga krisis naghangkat kay Ka Maya nga magbiya sang iya komportable nga kabuhi kag mag-amot sa iya kinaalam kag propesyon para sa ginapigos kag ginahimuslan nga pumuluyo kag sa rebolusyon.

Sa atubang sang nagapermi nga krisis sang malakolonyal kag malapyudal nga sistema, wala sang kasanag ang buwas damlag sang mga pamatan-on. Ginadingutan ang pamatan-on sang edukasyon, ginprograma nga daw mga robot paagi sa mga neoliberal nga polisiya sa edukasyon, kag ginahimo nga gatasan sang barato nga kusog pangabudlay.

Sa garok nga sistema nga mala-kolonyal kag mala-pyudal, wala untat nga mag-ilig ang dugo sang mga bag-ong pamatan-on nga mag-usoy sa banas sang armado nga rebolusyon. Linibu-libo pa ang magsugpon sa kabuhi ni Ka Maya kag manubli sang iya armas agud maangkon ang pungsodnon nga kahilwayan kag demokrasya. Mga pamatan-on magpasakop na sa NPA!

Hustisya para sa Bilar 5!
Mabuhay ang mga rebolusyonaryong martir!

Mabuhay si Ka Jandy! Iloy, Pulang hangaway, Rebolusyonaryo!

Makabayang Kilusan ng Bagong Kababaihan-Southwest Negros
Marso 13, 2024

Ang Makabayang Kilusan ng Bagong Kababaihan (MAKIBAKA)-Southwest Negros taas-kamao nga nagapaabot sang amon hugot nga pagsaludo kay Emmarie “Ka Jandy” Pastidio, isa ka iloy, Pulang hangaway kag rebolusyonaryo. Sadtong Pebrero 21, 2024, namartir si Ka Jandy upod si Ka Jorge (Joshua Sultan) sa isa ka engkwentro sa Sityo Mansulao, Barangay Pinapugasan, Escalante City, Negros Occidental.

Ginapaabot namon ang amon pagpangasubo sa mga abyan kag pamilya nila Ka Jandy kag Ka Jorge ilabi na sa iya banahon nga si Ka Peeta, isa man ka Pulang hangaway, kag sa iya anak nga si Baby Marx Cairo Salino nga tubtob subong, ara pa gihapon sa kamot sang reaksyonaryong estado paagi sa NTF-Elcac.

Mabakod nga nanindugan si Ka Jandy sa rebolusyon tubtub sa iya kamatayon. Masalimuot ang nangin kabuhi ni Ka Jandy nga naghatag kabakud sang iya panindugan nga lubos panahon nga mag-alagad sa masang mangunguma. Puno sang kaisog kag determinasyon niya nga gin-atubang ang mga pagpamintas, pagpanghimulos kag pagpamigos nga bunga sang burges-pyudal nga panan-awan sa kababainhan sang sosyedad.

Antes nagpasakop sa New People’s Army (NPA), nangin pamatan-on nga organisador pangkultura si Ka Jandy sa nabukid nga bahin sang San Carlos City, Negros Occidental. Gindakop siya upod ang isa pa ka organisador sang 2018 kag napaidalum sa mental torture kag pagpamahug sang terorista nga tropa sang 79th IB sang Armed Forces of the Philippines (AFP). Sadtong Enero 13, 2021, gin-abdak siya sang nag-maternity leave agud maatipan ang duha ka bulan niya nga bata nga si Baby Marx. Indi matupongan ang sakit nga naagum ni Ka Jandy sang pilit nga ginhamulag sa iya ang iya bata. Iya man nga gin-antus ang mental torture kag pisikal nga pagpanghimulos pareho sang pagsunog sang sigarilyo sa iya nga lawas kag paglugos sa iya sang mga wala kaluoy nga soldado sang 79th IB sulod sa 10 ka adlaw.

Bisan amo ini ang mga inagihan ni Ka Jandy, wala niya ginbaylo ang iya rebolusyonaryo nga panindugan para sa paltik nga kahilwayan paagi sa programa nga amnestiya sang reaksyonaryo nga estado. Wala nagpabaya si Ka Jandy sa iya pagka-iloy kay Baby Marx kundi ginhungod mismo sang reaksyonaryo nga estado paagi sa NTF-Elcac nga dingutan siya sa iya bata. Ginhimo nga siod sang pasista nga rehimen si Baby Marx agud mapasungka si Ka Jandy kag Ka Peeta. Namartir si Ka Jandy nga wala makita liwat ang iya bata.

Indi makatarunganon ang paghimo kay Baby Marx bilang hostage sang NTF-Elcac sa sulod sang tatlo ka tuig kag lapas ini sa internasyunal nga laye sang gyera kag  internasyunal nga makitawhanon nga laye kaangot sa ispesyal nga proteksyon sang mga lapsag, mga kabataan kag sa mga busong.

Ginpakita sa kabuhi ni Ka Jandy ang kadesperado sang rehimen Marcos Jr nga tapuson na ang armado nga rebolusyon, apang indi ini malutos tubtub indi magabot ang ugat sang burges-pyudal nga sistema—ang imperyalismo, pyudalismo, kag burukrata kapitalismo. Tubtub indi pa mahilway ang ginapigos kag ginahimuslan ilabi na ang mga kababainhan, magadamo pa ang mga kababainhan nga makigbahin sa pungsodnon demokratiko nga rebolusyon.

Ginapanawagan man sang MAKIBAKA-Southwest Negros sa tanan nga mga progresibong organisasyon sang kababainhan, mga tagasakdag sang kinamatarung sang mga kabataan kag sa tanan nga progresibong pwersa nga magtib-ong para sa kampanya sa paghilway kay Baby Marx.

Mabuhay si Ka Jandy!
Mabuhay ang mga rebolusyonaryong kababainhan!
Free Baby Marx! ###

#TroopAlert! | 15th IB naga-operasyon sa Cauayan kag Sipalay City

Sumugod kagahapon, naga-operasyon militar ang mga tropa sang 15th IB sa banwa sang Cauayan, Negros Occidental. May kolum nga nakita sa mga sityo sang Pasto, Kisol kag Tangwan, tanan sakop sang Brgy. Inayawan. May ara man lain nga kolum sa mga sityo sang Patol kag Putlak, Brgy. Caliling. Duha ka rio trak ang gindul-ong sa Brgy. Baclao.

Mentinado gihapon ang mga pwersa sang 15th IB sa Sityo Indangawan, Brgy. Manlucahoc, Sipalay City, Negros Occidental.

Reference:
Ka Andrea Guerrero
Tigpamaba
Armando Sumayang Jr Command-New People’s Army
SOuthwest Negros Guerrilla Front