Mayo 20, 2024
Ka JB Regalado
Spokesperson
Leonardo Panaligan Command
New People’s Army
Central Negros Guerrilla Front
Taas-kamao nga nagasinggitan sang hustisya ang mga pumuluyo sa kaumahan sang Central Negros subong nga adlaw, Mayo 20. Nagasimpatiya man kami sa mga pamilya sang biktima sang padayon kag lapnagon nga pagbayolar sang tawhanon nga kinamatarung sang pumuluyo sa mga kaumahan sang Central Negros kaangay sang redtagging, iligal nga pagpang-aresto paagi sa hinimu-himo nga mga kaso, pagpamahug, paagpangbomba, kag ekstrahudisyal nga pagpamatay kag pagmasaker sa mga inosenteng sibilyan nga ginkomiter sang Armed Forces of the Philippines (AFP), Philippine National Police (PNP) kag mga paramilitar sini sa idalom sang “duguon nga kamot” sang rehimen US-Marcos II.
Ang Leonardo Panaligan Command-New People’s Army (LPC-NPA) kag Communist Party of the Philippines (CPP), mga alyado kag abyan upod ang bug-os nga rebolusyonaryong masa kag mga pumuluyo, mabaskog nga nagakondenar sa brutal nga pagpamatay sa mga inosenteng mangunguma sang Moises Padilla, Negros Occidental kag Guihulngan City, Negros Oriental sang nagligad nga Mayo 20 kag Mayo 21, 2023. Ginhatagan sang LPC-NPA sang pagpasidungog ang kabuhi sang mag-asawa nga Julieven Ramirez, 23 anyos, kag Evelyn Meren, 31 anyos, kag mangunguma nga si Ruben Obidas tanan sang Barangay Quintin Remo, Moises Padilla. Lakip nga ginapasidunggan ang mag-amay nga sanday Jurielen Babor kag Antonio Babor sa Sityo Amumuyong, Barangay Trinidad, Guihulngan City nga wala kaluoy nga ginpamatay sang pasistang militar.
Nadumduman, Mayo 20, 2023 alas 5:00 sang kaagahon, natabo ang engkwentro sa tunga sang NPA kag berdugong tropa sang 62nd IB sa pagpamuno ni Col. William Pesase sa Sityo Napiluan, Barangay Quintin Remo, Moises Padilla. Samtang nagalapuyot ang linukpanay, ginpa-arakan man sang “trigger happy” nga 62nd IB ang balay sang mag-asawa nga Ramirez, diin ara man sa sulod ang nasambit nga mag-asawa. Gilayon nga ginlusob sang militar ang balay kag nakita sini nga pilason kag buhi pa ang mag-asawa. Wala-kaluoy nga ginpangtiro sang 62nd IB ang mag-asawa rason sang ila hilaw nga kamatayon. Patay man si Obidas matapos ang patarasak nga pagpaniro sang berdugong 62nd IB. Ginlakip ang mag-asawang Ramirez kag si Obidas nga mga kaswalti sa hanay sang NPA. Ang mga biktima tumandok sa amo nga lugar.
Samtang Mayo 21, 2023 pasado alas 5:00 sang kaagahon natabo naman ang separado nga engkwentro sa tunga sang NPA kag tropa sang 16th Scout Ranger Company sa Sityo Amumuyong, Barangay Trinidad, Guihulngan City. Sa patarasak man nga pagpaniro sang nasambit nga pasistang tropa, napatay ang mag-amay nga sanday Jurielen Babor, 27 anyos, kag Antonio Babor, 77 anyos, mga mga sibilyan kag tumandok nga mangunguma sa nasambit nga lugar.
Ang pumuluyo kag tanan nga yunit sang LPC-NPA sa Central Negros upod sa pamilya sang mga biktima sang mga kalakasan sang pasistang tropa militar sa idalum sang terorismo sang US-Marcos II, ang padayon nga magahimakas kag indi mag-untat sa pagpangita sang nagakaigo nga hustisya.
“Wala bisan anu ang pumuluyo kon wala sang NPA.” Padayon sini nga pangapinan ang interes sang malapad nga masang pigos kag ginahimuslan sa isla sang Negros.
Mabuhay ang mga martir sang paghimakas!
Mabuhay ang masa! ###
NegrosRevPortal 