Komiteng Rehiyunal sa Partido sa Isla sa Negros
Disyembre 26, 2023
Ang Komiteng Rehiyunal sa Partido sa Isla sa Negros (KRPIN) nagpahalipay sa tanang mga kadre ug sakop sa Partido sa Isla, tanang mga Pulang kumander ug manggugubat sa lima ka larangang gerilya ilawom sa Apolinario Gatmaitan Command-New People’s Army Negros Island Regional Operational Command (AGC-NPA), mga alyadong pwersa sa National Democratic Front (NDF)-Negros ug sa tibuok katawhang gilupigan ug gipahimuslan sa isla sa higayon sa ika-55 nga kasumaran sa subling pagkatukod sa Communist Party of the Philippines (CPP) sa ilang maisogong pagsalmot ug pagtampo sa kinabuhi’g kamatayong pakig-away aron mapangibabawan ang kontra-rebolusyonaryong kampanya sa inutil ug korap nga rehimeng US-Marcos Jr niining tuiga.
Hul-os namong gibayaw ang among tuong kumo timaan sa mapula ug militanteng pagsaludo sa tanang mga rebolusyonaryong martir ug bayani nga mihalad sa ilang bililhong kinabuhi aron mapatuman ang mga tahas sa rebolusyon nga mihatag og dugang kahulogan sa atong makasaysayanong pagsaulog karon, hilabina ang namartir nga sekretaryo sa KRPIN nga si Rogelio Posadas (Ka Cocoy). Maisogong gi-atubang sa atong mga rebolusyonaryong martir ug bayani ang pasistang kaaway nga walay pagbuhi sa ilang mga prinsipyo ug sinumpaan sa Partido bisan pa sa katapusang pitik sa ilang mga pulso. Gipasidunggan usab kanato ang mga rebolusyonaryong masa nga nagbuhis sa ilang kinabuhi sa pagpasulong sa demokratikong rebolusyon sa katawhan ug armadong pakigbisog.
Gisaulog nato ang ika-55 nga anibersaryo sa Partido nga puno sa rebolusyonaryong optimismo tungod sa atong mga naani nga kadaugan sa nataran sa ideolohiya, pulitika ug organisasyon bisan sa mga unos nga atong gi-atubang niining tuiga. Kadungan usab niini ang pagtipon sa atong mga kahuyangan ug kasaypanang makuhaan og mga bulawanong pagtulun-an nga mosilbing iwag sa pagpaasdang sa malanatong gubat sa katawhan sa mas taas nga ang-ang. Pursigido kitang ipatuman ang mga rebolusyonaryong gimbuhaton, dugang nga pangibabawan ang mga kahuyangan, ug maisogon ug militanteng atubangon ang mas dagkung mga hagit sa mosunod nga panahon.
I. Puno sa kayugot ang katawhang Negrosanon sa rehimeng US-Marcos II
Padayong mikunhod ang sistemang alang-alang pyudal ug alang-alang kolonyal sa paghari sa ilehitimong rehimeng US-Marcos II. Si Ferdinand Marcos Jr, susama sa iyang amahang diktadur, ang hul-os nga papet sa imperyalismong US. Tin-aw kini diha sa bug-os nga pagpatuman sa mga gipahamtang sa US nga mga neoliberal nga palisiya sa pribatisasyon, deregulasyon ug liberalisasyon. Gani, may plano na usab ang nagkumboyang Marcos-Romualdez nga iduso ang pagbag-o sa batakang balaod sa nasud aron dugang i-abli ang atong ekonomiya sa langyaw’ng interes.
Gisakmit usab sa US ang hisgutanan sa pagdepensa sa soberanya sa Pilipinas diha sa West Philippine Sea aron pig-uton ang China nga kaaway’ng imperyalistang nasud niini. Gipaspasan ang paglutos sa CPP-NPA-NDFP aron magamit ang reaksyonaryong armadong pwersa para sa mihait nga inter-imperyalistang kaguliyang. Apan, nahibaw-an sa US nga nakulit na sa kasaysayan nga ang paghait sa imperyalistang panagbangi mao ang tambok nga kundisyon nga momugna sa pagpanumbalik sa proletaryadong rebolusyon sa tibuok kalibutan.
Ang pagsiak sa alyansa sa mga Marcos ug Duterte mugna usab sa away sa ilang mga imperyalistang amo. Ang pagsalikway ni Marcos sa mga proyekto sa China nga ang mga Duterte ang may dakung kikbak, sa aktwal pabor usab sa mga tigpamuhunan sa US ug mga kakumboya niining nasud sama sa Japan ug Australia. Aduna usab internal nga indiganay sa duha ka pundok sa pagkamkam sa bahandi ug gahum. Isig maniobra sa pulitika sama sa pagpasulod sa International Criminal Court kalabot sa drug war ni Duterte ug paglihok para sa de-istabilisasyon sa administrasyong Marcos, hilabina nga naghilapit ang eleksyong 2025.
Nasalamin sa isla sa Negros ang alang-alang pyudal ug alang-alang kolonyal nga sistema sa Pilipinas. Nagpabiling atrasado ang ekonomiya nga nagsalig sa monocrop nga industriya sa kalamay. Ang sobra 330,000 ka mga mamumuo sa katubhan sa Negros, lakip na ang dul-an sa 5,000 ka mga sakada gikan sa ubang probinsya, mao ang organisado sa produksyon sa tubo apan naggamit pa gihapon sa ispading, guna, karabaw ug uban pang mga atrasadong kagamitan. Kung aduna may mga katubhan nga migamit sa traktora ug uban pang mekanisadong kagamitan, pipila lamang kini ug dili mekanisado ang tibuok nga proseso sa produksyon. Kadaghanan sa mga mamumuo sa katubhan ang nahigot sa malupigong sistemang pakyaw, tuman ka mubong suholan, walay benepisyo, mapig-utong kahimtang sa pagtrabaho, ug kontraktwalisasyon. Sa mga sentrales sa Negros, ang gibana-banang 15,000 ka mga mamumuo (62.5% sa tibuok nasud) nag-antus usab sa mubong suholan. Kasagaran kanila mga kontraktwal ug walay benepisyo.
Ang lapad nga mga asyenda nga sobra sa 220,000 ka ektarya sa tibuok isla ug 13 ka mga sentrales ang gikuptan sa mga dagkung kumprador sama sa mga pamilyang Tan, Chan, Lopez ug Gokongwei kakunsabo ang mga daang asyenderong pamilyang mga Lacson, Marañon, Ledesma, Zayco, Peña, Alvarez, Tevez ug uban pa. Sila usab sa gihapon ang mga dagkung tigpamatigayon nga nagbaligya og kalamay paingon sa lokal nga merkado ug para sa eksport. Miapil usab sila sa aryendo ug usura aron dugang ma-ilog ang yuta sa mga mag-uuma. Sila ang dul-an sa 15% sa mga nagproduksyon sa tubo, apan gimonopolyo nila ang 61% sa yuta nga gitamnan og tubo. Buot ipasabot, ang tibuok industriya sa kalamay anaa sa kamot sa mga dagkung kumprador burgesya ug burukrata-agalong yutaan.
Sukwahi sa mga gagmay’ng planter (ang mga nanag-iya og lima ka ektarya o mas mubo pa) nga sobra 85%, apang 39% lang sa kayutaan ang ilang gipanag-iya. Ang mga gagmay’ng planter ang nabug-atan sa nagtaas nga presyo sa gasolina ug abono gawas pa sa karong panahon sa El Niño diha sa ilang pagpanglimbasog nga makabawi sa ilang pagtanom og tubo.
Mugna sa neoliberal nga palisiyang liberalisasyon sa agrikultura, partikular sa kalamay, ang pagbaha sa imported nga kalamay sa nasud nga mingresulta sa grabeng krisis sa industriya sa kalamay. Bisan kung nagreklamo ang mga dagkung planter nga nabangkarote sa karon nga kahimtang, sa aktwal, nius-os lang ang daku-daku nila kita. Ang tinuod nga apektado mao ang gagmay’ng planter nga nalubong sa utang tugod sa kamahal sa produksyon. Kadaghanan sa mga gagmay’ng planter ang nabangkarote, nawagtangan sa ilang yuta ug nahimong mga mamumuo-sa-kampo. Mingmubo usab ang ilang estado sa panginabuhian tungod nahigot sila sa dagkung utang, aryendo, prenda ug uban pang mga alang-alang pyudal nga pamaagi sa pagpahimulos. Mas grabe pa ang sitwasyon sa mamumuo-sa-katubhan, sa ilaha gibawi ang kapildihan sa mga asyendero pinaagi sa grabeng pagpamubo sa suholan, walay benepisyo ug patay-patay’ng pagtrabaho, ug tuman ka taas nga presyo sa mga palaliton.
Tungod sa krisis sa kalamay, ang mga dagkung agalong yutaan mipatuman sa “land use conversion” (gikumbirter ang mga katubhan paingon sa pangkomersyal nga gamit, mga solar farms, real estate, eko-turismo, ug uban pa), “crop conversion” (imbes nga tubo, motanom og mga tanom nga gidemanda sa pangkalibutanong kapitalistang merkado sama sa kape, cacao, saging, palm oil ug uban pa) samtang nagpadayon sa pagpuga og ganansya sa industriya sa kalamay.
Walay kabusgan ang mga dagkung kumprador ug agalong yutaan sa pagkamkam sa kayutaan sa isla sa Negros kakunsabo ang mga lokal nga pulitiko ug mga ahensya sa reaksyonaryong gobyerno. Sa Negros Occidental, sumala sa datus sa reaksyonaryong gobyerno, adunay kinatibuk-ang 235, 725 ka ektarya nga angayang i-apud-apod sa peke nga reporma sa yuta. Sa pagkakaron, aduna pay 30,311 nga wala giapod-apod. Sa unang pagtan-aw, gamay na lang ang porsyento sa wala na-apud apod, apan sa luyo niini, wala na sa kamot sa mga Agrarian Reform Beneficiary (ARB) ang yuta. Kaniadto pa lang 2013 sa Negros Occidental, 70% sa kayutaan sa mga ARBs nabalik na sa kontrol sa agalong yutaan.
Gipasamot pa kining sitwasyon sa pagpatuman sa Department of Agrarian Reform (DAR) sa programa nga gipaluyohan sa World Bank nga Support to Parcelization of Land for Individual Titling (SPLIT) program, ug New Agrarian Emancipation Act nga nagtumong sa pagpadali sa pagpang-ilog sa yuta sa mga mag-uuma. Dugang pa nga pamaagi sa pagkamkam sa yuta ang National Greening Program (NGP), Integrated Forest Management Agreement (IFMA) ug Socialized Industrial Forest Management Agreement (SIFMA) ilawom sa Department of Environment and Natural Resources (DENR).
Niining tuiga, gi-anunsyo sa pamilyang Consunji, ikawalong pinaka-adunahan sa nasud, ang pagpamuhunan sa ilang kumpaniya sa plantasyon sa palm oil sa Candoni, Negros Occidental nga naglangkob sa 6,000 ka ektarya sa kayutaan pinaagi sa pag-kombertir sa lasang paingon sa komersyal nga plantasyon ilawom sa IFMA. Samtang, sa mga lungsod sa Santa Catalina, Siaton ug Basay sa Negros Oriental nagsulod usab ang Midan Corporation, usa ka Koreano nga kompaniya, nga naghimo og mineral exploration sa nahisgutang lungsod.
Sa ilawom niining kahimtang sa isla sa Negros, nadaut ang mga mag-uuma sa kahumayan, koprasan, sagingan ug uban pang pananom. Migrabe pa ang pyudal ug alang-alang pyudal nga pagpahimulos sa kabanikanhan nga mipalanat sa gitawag nga tigkiriwi sa tibuok tuig. Ang kagutom, kawad-on sa trabaho ug mubong suholan miduso sa mga mag-uuma ug mga mamumuo-sa-umahan nga mipaingon sa kasyudaran para mangita’g trabaho. Apan, walay tupong nga krisis ang ilang nadangatan sa syudad.
Tungod sa kagustohan sa imperyalismong US nga sakmiton ang tanang bahin sa nasud para sa iyang interes, gipatuman ang mga proyekto sama sa reklamasyon sa kabaybayonan sa Negros para diri ipahimutang ang mga pantalan, ang mga dakung building nga mo-akomodar sa mga opisina ug uban pang panginahanglan sa mga langyaw, ug mga mall ug deparment stores nga han-ukanan sa mga sarplas nga produkto sa mga kapitalistang nasud sama sa US, China ug Japan. Diri man ipahimutang ang mga kumpaniya sa Business Process Outsourcing (BPO) nga usa usab ka tipo sa pagpahimulos sa mga petiburgesya sa syudad. Sa Negros Occidental, gipangunahan ni Mayor Albee Benitez ang planong himuong “Super City” ang syudad sa Bacolod nga molakip sa halos 2,000 ka ektaryang reklamasyon sa baybayon. Ingon man ang proyekto ni Mayor Felipe Remollo nga “Smart City” reclamation ug Pantawan 2 ug 3 nga reklamasyon sa Dumaguete City nga moabot sa sobra 700 ka ektarya.
Anaa usab ang pagsulod sa ubang mga dagkung negosyante diri sa Negros para sa pribatisasyon sa tubig ug kuryente sama sa kumpaniya sa mga Villar, Razon u Aboitiz. Sa pagkakaron, pribado ang serbisyo sa tubig sa Bacolod City, Himamaylan City ug Cadiz City sa Negros Occidental ilawom sa Primewater sa pamilyang Villar. Ang Central Negros Electirc Cooperative (CENECO) napribatisa usab ilawom sa pamilyang Razon pinaagi sa ilang kumpaniyang More Power. Imposisyon usab sa World Bank ang Jeepney Modernization Program nga gipatuman sa rehimeng US-Marcos. Mo-apekto kini sa mga drayber ug gagmay’ng opereytor sa tibuok nasud, lakip na diri sa Negros.
Ang rekurso sa tubig sa Negros Occidental nabutang usab sa peligro sa Bulk Water Project o mas tukmang tawgong mega dam project ni Gob. Eugenio Lacson sa Malugo River ug Imbang River sa norteng bahin sa Negros, kakunsabo ang US Agency for International Development (US-AID) ug Asian Development Bank (ADB) nga pundohan usab sa mga dagkung kumprador sama sa mga Aboitiz. Inay nga masulbad ang krisis sa tubig, mas mosamot pa ang epekto niining proyekto sa kinaiyahan ug sa panginabuhan sa katawhan sama sa mga mega dam project nga ginpatuman sa ubang bahin sa nasud.
Tuman kakabus, kagutom, kawad-on sa trabaho, murag ulipong sitwasyon sa pamuo, demolisyon, baha, kakulang sa serbisyong katilingbanon sama sa edukasyon ug kahimsog, ug daghan pa ang gi-antus karon sa katawhang Negrosanon. Sumala mismo sa datus sa reaksyonaryong gobyerno, dul-an sa 25% (o usa sa kada upat ka pamilya) sa sobra 4.6 ka milyong Negrosanon ang labing kabus nga pamilya sa isla niining tuiga. Apektado usab ang mga kabatan-onang Negrosanon. Dul-an sa 6.94% o 23, 435 ka estudyante ang wala nakapadayon sa pagtungha niining tuiga sa Negros Occidental. Sa Bacolod City, sobra sa 11,000 usab ang na-iban sa mga nag-enrol.
Gigamit sa mga dagkung kumprador ug burukrata-agalong yutaan ang ilang instrumento sa pasismo diri sa isla nga mao ang Armed Forces of the Philippines 3rd Infantry Division (AFP-3rd ID), Philippine National Police (PNP) ug National Task Force (NTF)–Elcac aron ipatuman ang de facto martial law. Gipatuman niini nga may impunidad ang mga focused military operation ug Retooled Community Support Program (RCSP) nga pasistang legasiya usab sa US-Duterte nga rehimen. Nakaposisyon karon ang pito ka batalyon sa Philippine Army ilawom sa 302nd kag 303rd Brigade ug tulo ka batalyon sa ispesyal nga pwersa sa PNP (Special Action Force, Regional Mobile Force ug Regional Public Safety) sa tibuok isla nga nagsabwag og kadaut ug kalisang hilabina sa mga komunidad sa mga mangunguma ug mamumuo-sa-umahan sa kabanikanhan.
Pila ka pilo nga kagrabehon ang gi-antus sa mga masang Negrosanon karon itandi sa nilabay. Taliwala sa ekonomikanhong krisis, migrabe usab ang mga pagpanglapas sa tawhanong katungod. Nahimong kaylap ang pagpangsalbeyds, mga masaker ug pagpangdagit sa tibuok isla, hilabina sa kabanikanhan. Ilawom sa rehimeng Marcos Jr, dul-an sa 600 (345 ang nahitabo niining tuiga) ang mga kaso sa pagpang-abuso sa mga reaksyonaryong pwersa sa estado sa tawhanong katungod sa isla nga milakip sa dul-an 40,000 ka katawhan kung sa diin, sobra sa 300 ang mga menor-de-edad. Kuyanap ang iligal nga pag-aresto ug pagdetine, tortyur, pagpanghulga, pagpang-ransak ug pagpangawat, pagpamomba ug uban pang mga kalapasan nga walay kaluoy’ng gihimo sa pasistang militar, kapulisan ug ilang mga pwersang paramilitar.
Walay hunong usab ang pagpamakak ug pagpanglingla sa AFP/PNP/NTF-Elcac. Ilang gipugos ang panaysayong nagmadinaugon ang ilang kontra-insurhensyang kampanya sa Negros pinaagi sa mga peke ug pugos nga mga pagpasurender sa mga mag-uuma ug mamumuo-sa-umahan, pagpangangkon sa mga “armadong engkwentro” bisan sa reyalidad mga takuban kini sa ilang mga krimen batok sa katawhan sama sa mga masaker, ug mga pagpanghambog nga “para sa katawhan” sa ilang walay kapuslanang Barangay Development Program (BDP). Pinakaulahing pagpanglingla ug panghambog sa rehimeng Marcos Jr ang bogus nga proklamasyong amnestiya nga ang tumong mao ang pagpakalma sa pagbatok sa katawhan. Ang BDP, Enhanced Comprehensive Local Integration Program (E-CLIP), ug mga badyet para sa NTF-Elcac sa mga lokal nga gobyerno ug ahensya ang nahimong gatasan sa mga korap nga heneral ug burukrata sa isla. Maong sa luyo sa pagpanghambog nga “napukan” ug “mihuyang” na ang NPA sa isla, walay hunong ang AFP/PNP/NTF-Elcac sa pagbubo og pondo sa kontra-insurhensyang kampanya.
Ang nagkagrabe nga kontradiksyon tali sa Marcos ug Duterte nga pundok, mitandog usab sa lokal nga pulitika. Gisapupo karon ni Gob. Lacson sa Negros Occidental ug ni Gob. Manuel Sagarbarria sa Negros Oriental, ang mipuli sa gipatay nga si Gob. Roel Degamo, ang pagpasaka sa balaud nga motukod sa Negros Island Region (NIR) aron ilang maangkon ang gahum sa pulitika ug mamonopolyo ang nahibiling natural nga bahandi sa isla. Nagkakusog usab ang impluwensya sa mga Bentiez sa Bacolod City ug norteng bahin sa isla. Diha sa panagbangi sa pulitika tali ni Gob. Degamo ug managsuong kanhing Gob. Pryde Henry Tevez ug kanhing Congressman Arnie Tevez, gipatay ang gobernador ug naangin ang siyam ka inosenteng lumulupyo niadtong Marso. Gisakmit usab sa AFP/PNP/NTF-Elcac ang nahitabo ni Degamo aron mahataga’g rason ang dugang militarisasyon sa tibuok isla.
Ang nagtunhay’ng sitwasyon ang nagpabukal sa bulkang sosyal sa isla sa Negros. Puno sa kayugot ang katawhang Negrosanon sa karong sitwasyon sa ilang kinabuhi. Ang ligal nga demokratikong kalihukan nagpasulong sa interes ug kaayuhan sa mga mamumuo, mag-uuma, alang-alang proletaryado ug mga petiburgesya sa kasyudaran. Daghan sa mga apektadong hut-ong ug sektor ang gustong mosalmot sa armadong pakigbisog sa kabanikanhan ug misuporta sa demokratikong re-bolusyon sa katawhan. Ang mga mag-uuma ug mamumuo-sa-umahan ang dinaghang misalmot ug misuporta sa NPA ug sa rebolusyonaryong kahilukan. Sila ang nangunang tinubdan sa mga Pulang manggugubat nga pangulohan sa Partido para sa pagpasulong sa gubat sa katawhan.
II. Pagpangulo sa Partido sa kinabuhi’g kamatayong pakigbisog batok sa imperyalismo, pyudalismo ug burukrata kapitalismo sa isla sa Negros
Lima na ka tuig sukad nga gipahamtang ang Memorandum Order (MO) 32 sa mga isla sa Negros ug Samar, ug Bicol region. Sa dagan sa mga katuigan kung asa gidun-an ang Negros sa kontra-rebolusyon, nakaangkon ang rebolusyonaryong pwersa sa tibuok isla og mga positibo ug negatibong pagtulun-an nga angayang kuptan aron mapangibabawan ang gipakusog nga atake sa kaaway ug mapa-asdang ang demokratikong rebolusyon sa katawhan pinaagi sa malanatong gubat sa katawhan sa mas taas nga ang-ang.
Niining tuiga, nangulo ug kuyog ang Partido sa rebolusyonaryong pwersa sa isla ug sa mga masang Negrosanon sa kinabuhi’g kamatayong pag-atubang sa imperyalismo, pyudalismo ug burukrata kapitalismo. Apan, adunay mga kahuyangan sa gimbuhatong pang-ideolohiya, pangpulitika ug pang-organisasyon nga nakabara sa mga pagsulong ug kinahanglang determinadong sulbaron ug tul-iron. Importanteng ilhon kanato ang mga kadaugan ug kasaypanan sa miaging tuig ug sa nag-una pang katuigan. Pinaagi lamang sa paglambo nga nagsandig sa mga nakab-ot nga kadaugan ug pagpangibabaw sa atong mga kasaypanan ug kahuyangan kita makatikang paingon sa walay tupong nga ang-ang sa pang-Partidong gimbuhaton.
Niining tuiga, padayon kitang mopanday sa ideolohiya sa giya sa Marxismo-Leninismo-Maoismo (MLM). Anaa ang KRPIN sa proseso sa pagsumada sa nilabay’ng lima ka tuig nga sumpay sa 22 ka tuig nga sumada sa rebolusyonaryong kasinatian sa isla sa Negros. Kabahin kini sa nasudnong panawagan sa paglunsad og kalihukang pagtul-id para masulbad ang mga nakababag sa paglambo ug dugang pagsulong sa nasudnon-demokratikong rebolusyon sa nilabay’ng pila ka tuig. Daghan pang mga leksyon ug esensya sa nag-unang sumada sa KRPIN nga dili pa hingpit nasabtan ug napraktika sa mga kadre ug sakop sa Partido. Diri kita nalansang ug gikinahanglang seryoso nga maningkamot para malingkawas sa mga kadena nga mibitad kanato paatras.
Taliwala sa sustenidong mga focused military operation sa kaaway’ng pwersa sa tanang larangang gerilya, napatigayon ang pagkonsolida sa Partido sa usa ka ang-ang). Human ang mga madinaugong paghatag sa Abanteng Kurso sa Partido (AKP) niadtong 2022, mamugnaon usab nga gilunsad sa tulo ka larangan ang pagtuon sa Batakang Kurso sa Partido (BKP) samtang may duha ka larangan nga nakahatag sa Intermedyang Kurso sa Partido (IKP). Padayon sa gihapon ang mga pang-Partido nga pagtuon partikular sa Rebolusyon, ang politikal nga dyornal sa Partido. May pipila man nga nakatuon sa mga sinulat militar nila Mao Zedong, Zhu De ug Vo Nguyen Giap.
Positibo ang paghatag sa tulo ka lebel nga edukasyon sa Partido ug uban pang pang-Partido nga pagtuon, apan kabus ang nakab-ot nga pagsabot sa kahimtang karon sa isla tungod adunay pagkulang sa pagpalawom sa daghang natigom nga mga datus. Nagkahulogan kini nga kulang ang pag-aplikar sa teorya paingon sa praktika ug pagpataas niini sa mas taas nga ang-ang sa teorya ug praktika.
Sa karong panahon, labaw nga gikinahanglang madasigon sa pagbasa sa ekonomikanhun ug pangpulitikal nga kahimtang sa paspas nga paglambo sa sitwasyon ilabina sa sunod-sunod nga pagpatuman sa neoliberal nga programa sa isla. Kung mohinay kita, dili epektibong mapangulohan ug magiyahan ang mga pakig-away sa mga masa. Usa kini sa mga rason nga anaa apan luya ug katag-katag ang mga masang pakigbisog sa kabanikanhan man o sa kasyudaran, kontra-pyudal nga pakigbisog ilabina sa ang-ang sa baryo paingon sa rehiyunal nga kampanya, pagpatuman sa minimum nga reporma sa yuta, ug uban pa. Gani, adunay kalisdanan sa paglunsad og mga pakigbisog para sa makabuhing suholan ug benepisyo sa mga mamumuo ug mamumuo-sa-umahan partikular sa gambalay sa monocrop nga ekonomiya sa kalamay sa Negros. Murag nangapkap kita sa kangitngit sa paglunsad og mga kampanyang masa tungod kabos ang gimbuhatong Katilingbanong Pakisusi ug Pagtuki sa Hut-ong (KPPH) o SICA. Wala nagamit ang tibuok nga makayang kusog sa rebolusyonaryong baseng masa para sa pagkonsolida sa rebolusyonaryong gahum ug dugang pagpalapad. Sa laing pagka-istorya, luag usab ang pagkupot sa linyang masa.
Ang milanat nga suhetibismo sa dagway sa empirisismo maoy nangunang kahuyangan sa ideolohiya sa KRPIN ug ginsakpan niini. Nagtuhay pa gihapon ang mekanikal ug empirisistang pamaagi sa pagtuon ug pagsulbaad sa mga problema. Bisan pa man, naningkamot ang Partido sa Negros nga mapatuman ang iyang papel sa pagpangulo sa rebolusyon sa isla aron makatampo sa nasudnong paningkamot sa pagpasulong hangtud makab-ot ang hingpit nga kadaugan.
Taliwala sa peke nga dedlayn sa kaaway nga dugmokon ang rebolusyonaryong kalihukan sa isla hilabina ang armadong hinagiban sa Partido nga mao ang NPA, padayong nagtunhay ang rebolusyon sa Negros ug gipangunahan sa gihapon sa NPA ang integradong gimbuhaton sa gubat sa katawhan nga mao ang paglunsad sa armadong pakigbisog, pagpatuman sa rebolusyong agsraryo ug pagtukod og baseng masa.
Imbes nga lutoson ang NPA, gilunsad sa AFP/PNP/NTF-Elcac ang dautang atake sa mga komunidad sa mag-uuma ug gihimo ang daghang mga paglapas sa internasyunal nga maki-tawhanong balaud ug sa Comprehensive Agreement on Respect for Human Rights and International Humanitarian Law (CARHRIHL). Niining tuiga, 28 ka mga mag-uuma ug 11 ka hors de combat nga mga Pulang manggugubat ang tinalawang gipatay sa mga pasistang pwersa sa reaksyonaryong estado. Nahimong kaylap ang pagpangdagit kung asa kutob karon “missing” pa sila Lyngrace Marturillas, Denald Mialen, Rene delos Santos ug Deah Lopez. Nabantog ang makalilisang nga pagpatay sa 94th IB sa pamilyang Fausto nga mikutlo sa kinabuhi sa magtiayong mag-uuma ug duha nila ka menor de edad nga mga anak sa Hima-maylan City, Negros Occidental. Niining tuiga, pinakawalay kalu-oy’ng binuhatan ang pag-abdak, pagtortyur ug gilayong pagsalbeyds kang Rogelio Posadas (Ka Cocoy), rehiyunal nga kadre ug usa usab ka peace consultant, niadtong Abril ug pagmasaker sa lima ka hors de combat (lakip na ang usa ka mabdus) nga mga Pulang manggugubat ug ang ilang kuyog nga drayber sa traysikol sa Kabankalan City, Negros Occidental niadtong Setyembre. Ang matag gipatay ug mga brutal nga kadautan nga gihimo sa AFP/ PNP/NT-Elcac nakulit sa huna-huna ug kasingkasing sa masang Negrosanon ug nagsugnod sa ilang pagbati nga maningil sa hustisya.
Midaghan usab niining tuiga ang mga pekeng engkwentro nga gigamit isip takuban sa mga krimen batok sa katawhan nga walay ka-ulaw’ng gihimo sa mga pasistang tropang militar. Ilawom sa rehimeng US-Marcos II, 37 ang mga pekeng engkwentro kung asa 23 ang nahitabo niining tuiga (dul-an sa duha ka pekeng engkwentro sa matag bulan). Ang mga pekeng engkwentro gigamit nga pangatarungan sa mga mangil-ad nga pagpatay ug pagmasaker sa mga mag-uuma ug mga hors de combat, pakyas nga pagpatay, iligal nga pag-aresto ug pagbilanggo, pagpangastigo, pagpamomba, paturagas nga pagpamusil ug pag-istraping; pagtabon sa pinusilay tali sa mga militar ug pulis (mis-encounter); ug adunay higayong gihimu-himo lamang ukon pekeng balita. Maayo ang paningkamot sa tanang mga tigpamaba, sa rehiyunal kutob sa ang-ang sa mga larangang gerilya, nga paspas nga gitubag ug gipadayag ang mga pekeng balita ug mga malisyosong intriga sa makinaryas sa pagpamakak ug pagpanglingla sa AFP/ PNP/NTF-Elcac.
Tinuod nga nakahiagum og kadaut ang mga larangang gerilya sa isla sa Negros sa brutal ug puno sa impunidad nga kontra-insurhensyang kampanya apan nagdamgo lamang sa udtong-tutok ang kaaway sa pagtuo nga mapukan ang rebolusyonaryong pwersa. Kutob anaa ang imperyalismo, pyudalismo ug burukrata kapitalismo nga maoy sukaranan sa pagtunhay sa rebolusyonaryong armadong pakigbisog, magpabilin ug mosulong ang demokratikong rebolusyon sa katawhan. Ang mas nangunang mga hinungdan sa usa ka ang-ang nga paghuyang ug sa mga naagum nga kadaut sa Pulang hukbo mao ang nagtunhay’ng konserbatismong militar, pagka-luag sa disiplinang militar, pag-ubod-ubod sa mga konsolidado apan limitadong ispasyo ug pagbalewala sa lapad nga eryang wala pa nakab-ot, kakulangan sa paghangop sa pulitiko-militar nga linya sa kaylap ug sunson nga gerilyang pakiggubat subay sa nagkalapad ug nagkalawom nga baseng masa sa ang-ang sa estratehikong depensiba, ug ang pagka-kampante sa ang-ang sa atong nakab-ot karon, dili pa tungod sa pagkusog sa dinagku ug mabangis nga atake sa kaaway. Anaa man ang kusog nga tendensiyang dili seryosong gipalibogan ang mga gi-atubang nga sirkumstansya ug gipakamubo ang kapasidad sa kaaway.
Bisan unsaon pa sa pagpanghambog sa kaaway, maguba ang iyang kahambog sa aktwal nga mga kadaugan sa paglunsad sa gubat sa katawhan. Padayon ang lima ka larangang gerilya ilawom sa AGC-NPA Negros Island sa paglunsad og anihilatibo ug atritibong mga taktikal nga opensiba ug pagpatuman sa mga punitibong aksyon subay sa desisyon sa rebolusyonaryong korte sa katawhan. Sulod sa 2023, 54 ka mga aksyong militar ug punitibong aksyon ang nalunsad batok sa mga pasistang tropa, sa ilang mga paramilitar nga pwersa ug intelligence network sa tibuok isla ug uban pang mga dautang elemento. Pinakamadinaugon ang ambus sa 10 ka elemento sa pulis sa Calatrava, Negros Occidental niadtong Agosto nga nakakuha’g tulo ka M16, mga bala ug usa ka mubong armas, ug mipatay sa usa ka pulis samtang samaron ang tulo pa, lakip ang deputy chief sa pulis sa Calatrava. Ang mga opensiba sa NPA Negros sa kinatibuk-an, nakasakmit og 22 ka armas ug nakamugna og 72 ka kaswalidad sa kaaway, kung asa 40 ang napatay sa awayan.
Taliwala sa sustenido ug dinagkung atake sa kaaway, padayon ang pulitiko-militar nga pagbansay sa mga Pulang kumander ug manggugubat ug mga bag-ong rekrut, ug mga section guerilla unit ug yunit milisya sa matag larangang gerilya. Gihatag ang batakang kursong pulitiko-militar ug mga topiko niini. Sa han-ay sa organisasyong masa, padayon gihapon ang paghatag sa pulitikal nga pagtuon sa gambalay sa Pambansa-Demokratikong Paaralan (PADEPA) sa mamugnaong mga pamaagi. Gihatag ang Ang Bayan ug Ang Paghimakas isip giya sa propaganda sa nagkalain-laing mga isyu sa katilingban ug pagtuki niini. Anaa usab ang programa sa literasiya ug numerasiya nga dili lamang para sa mga kabataan kung dili bisan sa mga may edad ug tigulang na nga wala nakasuway sa pagtungha. Ingonman, gilunsad ang kampanyang masa para sa pagpalambo sa kahimsog sa publiko ug sanitasyon, ug pagpataas sa produksyon sa mga mag-uuma. Gipatuman usab ang arbitrasyon ug rebolusyonaryong hustisya sa pagsulbad sa nagtunhay’ng mga suliran tali sa lapad nga masa. Apan sa kinatibuk-an, minimum pa gihapon ang nakab-ot sa gimbuhatong masa ug gikinahanglan gilayong masulba ang mga kalisdanan.
Sa kontra-pasistang kampanya, milambo ang pagmonitor ug pagpadayag sa mga pagpanglapas sa tawhanong katungod sa mga pasistang reaksyonaryong pwersa. Dakung hagit dili lamang sa rebolusyonaryong mga pwersa kundili sa mga grupo ug indibidwal nga nagduso sa tawhanong katungod ug katilingbanong hustisya ang unsan nga makaabot sa pampublikong entablado ang mga hisgutanan sa kontra-pasistang panawagan ug masumpay ug mapataas paingon sa kontra-pyudal ug kontra-imperyalistang pakigbisog ilabina sa karong sitwasyon sa luyo sa pasistang pagpang-atake sa kaaway, anaa ang pagpatuman sa neoliberal nga mga palisiya ug walay kabusganang pagpangamkam sa kayutaan ug pyudal ug alang-alang pyudal nga pagpahimulos.
Sa kasyudaran, ang ligal nga demokratikong kalihukan ang mikonsolida sa kusog ug misulong sa interes sa katawhan. Kining tuiga, nahimong unod sa kontra-imperyalista, kontra-pyudal ug kontra-pasistang kalihukan ang mga panawagan batok sa mga neoliberal nga palisiya nga gipatuman sa isla sa Negros, pagpanghilabot sa US ug China sa West Philippine Sea, mga makadaut nga mina ug quarry, pagtaas sa presyo sa gasolina ug mga inadlaw-adlaw’ng panginahanglan sa katawhan, mga reklamasyon sa kabaybayonan, pribatisasyon sa tubig ug kuryente, pag-phaseout sa mga dyip, ug mga palas-anong buhis sa mga batakang palaliton. Gipanawagan nila ang pagbasura sa Maharlika Investment Fund, confidential funds ug NTF-Elcac. Milanog usab sa tibuok isla ang singgit para sa hustisya, pagpahunong sa militarisasyon sa kabanikanhan, ug pagpabalik sa istoryahanay pang-kalinaw tali sa GRP ug NDFP. Miduyog usab ang dayag nga kalihukang masa sa tibuok kalibutan sa panawagang hunongon ang pagpahimulos sa katawhang Palestino ug tapuson na sa Israel ang pagpanakop sa Gaza.
Ang mga aktibista ug progresibong grupo nahimong target sa reaksyonaryong estado ug biktima sila sa red-tagging, sarbeylans, abdaksyon, pagpang-hulga ug harassment, ug uban pa tungod sa ilang pagbatok ug pagpadayag sa mga suliran sa katilingban. Bisan pa man, wala sila nagpadala sa kahadlok ug naninguha para sa mas dagkung rehiyunal nga kampanya sama sa pakigbisog para sa makabuhing suholan ug benepisyo sa mga mamumuo ug mamumuo-sa-umahan, ug pag-atubang sa mga nagkalain-laing mga neoliberal nga atake sa kasyudaran ug kabanikanhan. Ang karong natigom nga kusog gikinahanglang magamit para sa dugang pagpukaw, pag-organisa ug pagpalihok sa lapad nga katawhang Negrosanon. Mahimong pwersa kini sa dugang pagpalapad ug pagkonsolida.
Signipikante ang natampo sa mga tawong simbahan niining tuiga sa pagpakayab sa mga isyu sa katawhan. Dili malimtan ang makasaysayanong papel sa sektor sa simbahan gikan pa sa dekada ’70 diri sa Negros. Susama sa miagi, angayang magkuyogay ang tanang mga demokratikong sektor, hilabina ang mga mamumuo ug kabatan-onan, aron makaasdang ang kalihukang masa sa kasyudaran nga katimbang sa armadong pakigbisog sa kabanikanhan isip nangunang porma sa pakigbisog.
Ang Partido ang nangulong pwersa sa ligal nga demokratikong kalihukan ug nagdumala sa pagsumpay sa kalihukan sa kasyudaran ug kabanikanhan. Ang nagtunhay’ng sulog sa tuong oportunismo ug repormismo sa sulod mismo sa mga organisasyon sa Partido sa kasyudaran kinahanglang batukan ug hingpit nga pangibabawan aron mapataas ang kapasidad nga ipakig-away ang demokratikong katungod ug kaayuhan sa katawhan ug mapalambo ang militanteng pamaagi ug estilo sa pagtrabaho sa mga rebolusyonaryong gimbuhaton. Diha kita mas mahimong epektibo sa pagpangulo sa masa.
Hiktin pa ang nagkahiusang prente sa Negros sa panahong kaylap ang neoliberal nga atake, migrabe ang katilingbanon ug ekonomikanhong sitwasyon sa mga nilupigan ug hinimuslang hut-ong ug sektor, ug sa pagkusog sa pasismo ug terorismo sa reaksyonaryong estado. Ang pinakalapad nga nagkahiusang prente sa mga nilupigan ug hinimuslan sa katilingban ang adunay kapasidad nga epektibong ihimulag ug pahuyangon ang kaaway. Sa pagpangulo sa Partido, ang nagkahiusang prente misuporta nanguna sa rebolusyonaryong armadong pakigbisog ug dugang nga mipukaw ug mipalihok sa daghang ihap sa katawhan nga lapas pa sa rebolusyonaryong organisadong pwersa diha sa pagsalmot sa nasudnon-demokratikong kalihukan.
Padayong lig-on ug hugot ang panaghiusa sa mga kadre sa KRPIN ug sa tibuok ginsakpan sa Partido sa isla sa Negros subay sa prinsipyo sa demokratikong sentralismo. Aduna may namartir nga mga rehiyunal nga kadre ug uban pang mga kauban niining tuiga, apan ang mga nagpabilin sa nagkalain-laing ang-ang ang andam nga mosagubang sa mga katungdanan ug, sa inspirasyon sa mga rebolusyonaryong martir ug bayani, dugang nga manlimbasog aron tumanon ang mga rebolusyonaryong gimbuhaton. Walay paghubas ang tinubdan sa Partido sa han-ay sa mga mamumuo, mag-uuma, kababayen-an, kabatan-onan ug uban pang mga sektor. Gipalambo ang tagsa-tagsang kapasidad sa pagpangulo pinaagi sa mga kurso sa pagtuon ug pagbansay ug sa kolektibong patrabaho ug pagtuman sa indi-bidwal nga katungdanan diha sa rebolusyonaryong pakigbisog sa masa. Dugang usab nga gipahugot ang panaghiusa sa matag sakop sa Partido sa pagpatuman sa mga pagsaway ug pagsaway-sa-kaugalingon.
III. Determinado ang tibuok ginsakpan sa Partido sa Negros sa pagtul-id sa mga kasaypanan ug dugang pagpalig-on sa Partido
Ilawom sa pagpangulo sa Partido sa Negros, napangibabawan sa rebolusyonaryong pwersa sa isla ang kampanya sa pagpangsugpo sa nagharing hut-ong niining tuiga. Paigo ang rebolusyonaryong kusog para mobangon gikan sa mga pag-atras ug paghuyang para mapataas pa ang nakab-ot nga mga rebolusyonaryong kadaugan sa ideolohiya, pulitika ug organisasyon. Sa diwa sa Ikaduhang Bantugang Kalihukang Pagtul-id kung asa gikan sa kusog-platun kaniadtong 1994, midaghan sa pila ka pilo ang NPA sa Negros ug subling mikusog ang rebolusyonaryong pwersa pinaagi sa pagbarug sa tukmang linya ug pagtul-id sa sayop, ingonman nga determinado ang karong mga rebolusyonaryong pwersa uban ang katawhang Negrosanon sa pagpatuman sa panawagan sa Komite Sentral sa paglunsad sa Ikatulong Bantugang Kalihukang Pagtul-id ug dugang pagpalig-on sa Partido.
1. Konsolidahon ang Partido sa Marxismo-Leninismo-Maoismo! Pursigidong ilunsad ang kalihukang pagtul-id!
Desididong awayon ang suhetibismo sa dagway sa empirisismo. Kinahanglang ipursige ang pagtapos sa lima ka tuig nga pagsumada sa rebolusyonaryong kasinatian sa isla ug gilayon nga ipakaylap sa tibuok ginsakpan sa Partido sa Negros aron mahimong giya sa pagtul-id ug pagpalambo sa mga rebolusyonaryong gimbuhaton. Ang karong kalihukang pagtul-id maoy kumprehensibong mopalig-on sa Partido, lakip na sa organisasyon. Busa, gikinahanglang manlimbasog sa pagpangibabaw sa mga kahuyangan ug pag-atras ug mahimong madasigon sa mga rebolusyonaryong gimbuhaton ug katungdanan.
Isalikway ang mekanikal nga estilo ug pamaagi sa pagtuon pinaagi sa mainantigong pag-aplikar sa MLM sa kongkretong kahimtang ug pagpalambo sa rebolusyonaryong praktika. Kinahanglan niini ang regular nga pagtasa sa plano ug programa sa Partido sa matag lebel ug ebalwasyon sa mga kadre ug yaweng gimbuhaton. Regular usab nga maglunsad og pagsaway ug pagsaway sa kaugalingon para magpabilin nga lig-on ang panaghiusa ug mapunting ang mga kasaypanan ug kahuyangan. Ang pagpahigayon og mga kumperensya kalambigit sa partikular nga mga rebolusyonaryong gimbuhaton ang usa usab ka paspas nga pamaagi sa pagbaylohanay og kasinatian ug pagkuha og leksyon.
Trabahuon ang pagpalab-as sa SICA gikan pa sa nilabay’ng mga tuig sa tanang ang-ang, sugod sa baryo hangtud sa rehiyunal nga lebel. Mahimo kining sukaranan sa mamugnaong pagpukaw, pag-organisa ug pagpalihok sa mga masa ug sa kaylap nga paglunsad og kontra-imperyalista, kontra-pyudal ug kontra-pasistang mga kampanya. Pinaagi niini maangkon usab ang suod nga kalambigitan sa mga masa ug mahimong maayo sa gimbuhatong masa.
Mahimong mamugnaon sa paglunsad sa tulo ka lebel nga kurso sa Partido bisan sa dinagku ug kaylap nga atakeng militar sa kaaway. Mohimo og plano para sa edukasyon ug pagbansay sa mga kadre ug sakmiton ang tanang mga oportunidad para mapatuman kini.
Padayong palig-unon ang pag-pangulo sa Partido nga lawom nga nakagamot sa mga masang anak-sa-buhat. Kab-uton ang gitakda nga gidaghanon sa rekrut sa Partido gikan sa mga abanteng aktibista samtang amgo nga dili mopasulod sa mga dautang elemento. Atimanon usab ang pagproseso sa hingpit nga pagkasakop sa mga kandidatong sakop sa Partido subay sa mando sa konstitusyon sa Partido. Tukuron usab ang daghang mga sanga ug grupo sa Partido sa kabanikanhan ug kasyudaran samtang girekober, subling gipa-aktibo, ug gikonsolida ang mga nagtunhay.
Mopatumaw og dugang mga kadre sa Partido para sa nagkalain-laing mga gimbuhaton sa rebolusyon. Ilhon ang dili patas nga paglambo sa mga sakop sa Partido ug pinaagi niini magtinabangay sa pagpataas sa rebolusyonaryong kaamguhan ug kapasidad sa matag-usa aron makab-ot ang pangkinatibuk-ang ang-ang sa pagsulong.
2. Absolutong pangulohan sa Partido ang NPA sa pagpasulong sa demokratikong rebolusyon sa katawhan!
Isip abanteng destakamento sa hut-ong mamumuo, gipangulohan sa CPP ang paglunsad og demokratikong rebolusyon sa katawhan pinaagi sa malanatong gubat sa katawhan. Kini nga rebolusyon adunay sosyalistang perspektiba ug tumong niining ihikyad ang pundasyon para sa komunismo. Adunay duha ka hinagiban ang Partido aron pukanon ang kaaway sa karong ang-ang sa rebolusyon —ang armadong pakigbisog ug nasudnong nagkahiusang prente. Armadong pakigbisog ang hinagiban sa paglumpag sa paghari sa kaaway ug pagsakmit sa gahum pangpulitika. Samtang ang nasudnong nagkahiusang prente ang hinagiban nga mopasiguro sa pisnakalapad nga suporta para sa armadong pakigbisog ug mosi-ak sa han-ay sa kaaway aron mahimulag ang pinaka-despotiko.
Kinahanglang mapasiguro sa Partido nga hugot nga huptan sa NPA ang tulo ka integradong gimbuhaton sa gubat sa katawhan— paglunsad og armadong paghimakas, pagpatuman sa rebolusyong agraryo ug pagtukod sa baseng masa—diha sa pabalud-balud nga pagsulong sa rebolusyon. Ang mga Pulang kumander ug manggugubat angayang magpaka-maayo sa paggamit sa estratehiya ug mga taktika sa gerilyang pakiggubat nga konsentrasyon, dispersal ug pagbalhin aron mabatukan ang dinagku ug sustenidong mga kampanyang pagliyok sa kaaway’ng pwersa. Kinahanglang mapangahasong molunsad og mga madinaugong batakang taktikal nga opensiba nga mopahuyang sa kaaway ug mosakmit og armas-luthang para sa dugang pag-armas sa mga bag-ong rekrut sa NPA ug sa mga tukuron pang bag-ong mga platun hangtud makatukod sa unahan og mga bag-ong larangang gerilya sa tumong nga palapdon ang teatro sa pakiggubat sa isla.
Ang atong prinsipal nga tumong mao ang paglunsad og mga batakang taktikal nga opensiba, apan angayang makumbinar ang mga atritibong aksyon nga momugna og kadaut sa kaaway ug mopamubo sa moral sa ilang mga sundalo. Ang mga kumpaniya sa minahan, plantasyon ug logging nga gipanag-iyahan sa mga kumpaniya sa langyaw ug mga dagkung kumprador-agalong yutaan lehitimo usab nga target sa mga taktikal nga opensiba tungod gisuyop niini ang super ganansya, gi-eksport ang mga hilaw nga materyales ug gipahuyang ang nasudnong ekonomiya, giguba ang kalikupan, giguba ang agrikultura ug gi-ilog ang mga yuta sa mga mag-uuma.
Sa kasamtangan natong kusog, samtang anaa pa sa estratehikong depesiba, kinahanglan mahimong maayo sa pagbasa sa dagan sa awayan, mopalibog sa matag sitwasyon ug huptan ang mga kalig-unan aron makab-ot ang taktikal nga superyoridad batok sa kaaway. Importante ang pagkupot sa displina ug mga lagda sa NPA. Ipatuman ang taas nga ang-ang sa pagsekreto, himuon nga buta ug bungol ang kaaway ug palig-unon ang pang-masang paniktik ug kumbat paniktik.
3. Hatagan og duon ang paglunsad og mga kumprehensibong kampanyang masa ilabina ang mga kontra-pyudal nga pakigbisog!
Ang nangunang unod sa atong gilunsad nga demokratikong rebolusyon sa katawhan mao ang hisgutanan sa yuta. Pinaagi lamang sa pagtubag sa demokratikong demanda sa mga mag-uuma mapalihok sa Partido ang mayoriya sa katawhang Pilipino para sa armadong pakigbisog. Gamit ang kontra-pyudal nga hut-onganong linya sa kabanikanhan, ipatuman ang minimum nga reporma sa yuta (pagpaubos sa abangan sa yuta, karabaw ug mga kagamitang panguma; pagpataas sa suholan sa mga mamumuo-sa-umahan; pagwagtang sa usura; pagpalambo sa presyohanay sa mga produkto sa uma pabor sa mga mag-uuma; ug pagpataas sa produksyon pinaagi sa indibidwal nga paningkamot ug simpleng kooperasyon ug tukuron ang baseng masa—mga organisasyong masa ug organo sa gahum pangpulitika.
Ang kontra-pyudal nga pakigbisog ang mahimong agi-anan usab para sa pagrekober sa baseng masa nga gibiyaan sa isa ka panahon taliwala sa dinagkung mga operasyong kumbat sa kaaway ug pagbuak sa kahadlok sa mga komunidad sa mag-uuma nga gisabwag sa militarisasyon sa kabani-kanhan. Kinahanglang mabansay ang mga kadre sa Partido, ilabina ang mga kabatan-onan, sa pagpangulo ug pagtaktisa sa mga kontra-pyudal nga pakigbisog ug uban pang mga kampanyang masa. Sa mga masang pakigbisog mapatumaw ang pinakaabanteng mga aktibista, lider masa, ug kadre sa Partido. Mahimong atabay usab kini sa mga pinakamaayong mga kumander ug sundalo sa katawhan.
Kinahanglang kuyogan sa pagpataas sa pangpulitikang kaamguhan ang paglunsad og kampanyang masa. Maduotong ilunsad ang mga pagtuon sa gambalay sa PADEPA. Ipasiguro ang paghatag sa Katilingban ug Rebolusyong Pilipino, Tun-anan sa mga Aktibista, mga Espesyal nga Kursong Masa ug Rebolusyonaryong Giya sa Reporma sa Yuta. Molunsad usab og kampanya sa patuon sa CARHRIHL ug draft sa NDFP sa Comprehensive Agreement on Social and Economic Reforms (CASER). Angayang subaybayan sa mga kadreng gi-asayn sa gimbuhatong edukasyon ang mga nahatag nga pagtuon sa mga masa aron dili magbalik-balik ug mapasigurong adunay mga materyales para sa pagtuon ilabina ang mga namantalang kopya sa mga pagtuon.
Mopadaghan og mga instruktor pinaagi sa paglunsad og mga paghanas ug mohimo og programa sa pagtukod sa mga mobile school aron mas mapalapad ang mahatagan sa mga pang-Partido ug pulitikal nga mga pagtuon taliwala sa mga operasyong militar sa AFP sa kabanikanhan. Ang mga instruktor kinahanglang magkugi sa dugang pagtuon sa rebolusyonaryong teorya ug magtuon usab sa pagpatin-aw ug pagsulbad sa mga praktikal nga suliran.
Kinahanglan mobansay og mga makinaryas sa propaganda sa kabanikanhan ug kasyudaran para sa pagpukaw ug pagpataas sa kaamguhang pangpulitika sa mga masa, pagpaisog kanila sa pag-atubang sa militarisasyon sa mga komunidad, ug pagpatin-aw sa mga pagpanglingla sa kaaway. Angayang mapatin-aw sa mga masa ang nagkalain-laing isyu ug nasudnong demokratikong pagtuki niini. Aktibo usab nga tubagon ug dili hatagag lugar ang mga bakak sa pasistang mersenaryong AFP/PNP/NTF-Elcac ug uban pang makinaryas sa estado nga gipakaylap sa mainstream media ug social media. Usa ka kalihukang masa ang gimbuhatong propaganda ug angayang makaabot sa lapad nga masa.
4. Isulong an kalihukang masa sa kasyudaran!
Kinahanglan palapdon ug pakusgon ang kalihukang masa sa kasyudaran dungan sa kabanikanhan. Hagit karon sa Partido ang pagpangulo sa usa ka kontra-imperyalista, kontra-pyudal ug kontra-pasistang kalihukan nga molanog sa tibuok isla kung asa mahimong sentro sa protesta ang kasyudaran.
Kinahanglang mahimong maduoton sa pagsabot kung giunsa pagpagrabe sa neoliberal nga mga posiliya ang kinabuhi ug panginabuhian sa mga mamumuo, mag-uuma, mangingisda, kabus nga taga-dakbayan sama sa mga drayber ug vendor, mga propesyunal, kabatan-onan, kababayen-an ug uban pang sektor aron epektibong mapukaw, ma-organisa ug mapalihok sila subay sa ilang mga pangkinatibuk-an ug sektoral nga mga isyu ug demanda. Ang lawom nga pagsabot sa kasamtangang kahimtang moresulta sa hait ug tin-aw nga mga pagtuki nga gakson sa mga masa. Diri usab mogawas ang tukmang mga pamaagi ug taktika sa pag-atubang sa mga nagkalain-laing isyu.
Mapangahasong kab-uton ang mga nilupigan ug hinimuslang katawhan pinaagi sa mainantusong gimbuhatong masa ug solidong pag-organisa. Tukuron ang mga tinagong organisasyong masa kung asa ang Partido ang anaa sa lubas sa han-ay sa mga batakang sektor ug tunga-tungang sektor. Palig-unon ug palapdon kini pinaagi sa edukasyong pangpulitika ug paglunsad og mga masang pakigbisog ug kampanya.
Dili mokampante sa gamay ug dugay nang mga lider ug sakop, sa dayag man o tinagong mga organisasyon. Angayang mopatumaw og mga bag-ong aktibista ug mga lider masa, ug gikan sa mga pinaka-abante, morekrut para sa Partido. Kinahanglang itisok kanila ang mahinungdanong papel sa ligal nga kalihukang masa sa kasyudaran sa pagpasulong sa armadong pakigbisog sa kabanikanhan. Magpadala og daghang matimgas nga mga kadre sa Partido ilabina gikan sa hut-ong mamumuo ug mga kabatan-onang intelektwal sa NPA aron mahimong mga Pulang kumander ug mga giyang pangpulitika sa mga nagtunhay ug tukurong mga larangang gerilya, dili magpakontento sa materyal nga suporta para sa armadoong pakigbisog.
Ang kasamtangang grabeng ekonomikanhon ug katilingbanong krisis ang mimugna og matambok nga kahimtang para sa mga ligal, patriyotiko ug progresibong mga pwersa sa pagtukod sa mga alyansa sa nagkalain-laing mga sektor, tagsa ka mga sektor ug mga alyansa subay sa isyu aron makab-ot ang pinakalapad nga bahin sa katawhan. Ang nagkahiusang prente ang hinagiban sa Partido nga aplikable sa nagkalain-laing ligal nga dagway sa pakigbisog ingon man sa mga rebolusyonaryong porma sa pakigbisog. Ang batakang alyansa sa mamumuo ug mag-uuma maoy lig-ong pundasyon para sa tanang tipo sa alyansa—progresibo, patriyotiko ug lapad apan temporaryo. Kining tanan angayang gamiton para mapalapad ang kusog ug impluwensya sa mga rebolusyonaryong pwersa, ug para mahimulag, mapahuyang ug mapukan ang kaaway’ng hut-ong nga sa karon girepresentahan sa nasi-ak nga alyansa sa mga Marcos ug Duterte.
Hatagan usab og pagtagad ang pagkab-ot sa ordinaryong mga sundalo ug pulis sa han-ay sa AFP ug PNP, ingonman sa mga CAFGU ug uban pang paramilitar nga pwersa. Tungod sa terorismo sa estado nga nimugna og grabeng kadaut sa kabanikanhan ug bisan sa kasyudaran ug sa kadunot sa mga reaksyonaryong institusyon, may mga bahin sa militar, pulis ug ilang mga pwersang paramilitar nga nangaluya. Angayang motukod og demokratikong kalihukan sa mga patriyotiko ug progresibong mga elemento sa ilang han-ay.
Mahinundanon ang mosunod nga pila ka tuig para sa Partido sa isla sa Negros. Kini ang mahimong sinugdanan sa pagpanumbalik sa rebolusyonaryong kusog ug paglapaw sa mga nilabay’ng kadaugan. Ang KRPIN ug tibuok nga rebolusyonaryong pwersa sa isla ang andam sa pagdawat sa mga hagit sa ika-55 nga tuig sa Partido. Mokusog ang pagbukal sa sosyal nga bulkan sa isla samtang mokusog ang gubat sa katawhan sa masang gilupigan ug gipahimuslan hangtud sa pagbuto niini nga timaan sa bag-ong yugto sa kasaysayan sa pagrebolusyon sa isla sa Negros.
Mabuhi ang demokratikong rebolusyon sa katawhan!
Mabuhi ang masang igan ug gipahimuslan!
Mabuhi ang Communist Party of the Philippines!
NegrosRevPortal 