Komiteng Rehiyunal sa Partido sa Isla sa Negros
Marso 29, 2024
Susama sa naglagiting nga kainit sa El Niño phenomenon karon, ang Komiteng Rehiyunal sa Partido sa Isla sa Negros (KRPIN) naghatag sa iyang mainiton ug rebolusyonaryong pagtimbaya ug taas-kumong pagsaludo sa tanang mga Pulang Kumander ug manggugubat ilawom sa Apolinario Gatmaitan Command-New People’s Army Negros Island Regional Operations Command (AGC-NPA), ingon man sa tibuok rebolusyonaryong pwersa ug katawhang Negrosanon sa pagsaulog sa ika-55 nga anibersaryo sa New People’s Army. Nakaangkon na sab kita og usa ka tuig nga kadaugan sa pagpakyas sa demonyo nga kapintas sa rehimeng US- Marcos II ug kadaugan sa pagpasulong sa demokratikong rebolusyon sa katawhan pinaagi sa malanatong gubat sa katawhan sa isla sa Negros.
Napatik na sa kasaysayan ang kabilin sa atong mga rebolusyonaryong martir ug bayani sama nila ni Rogelio Posadas, Ericson Acosta, Romeo Nanta, Kerima Lorena Tariman, Marilyn Badayos, Flor Ceballos ug uban pang naghalad sa ilang kinabuhi nga walay pagduhaduha diha sa sabakan sa rebolusyonaryong pakigbisog sa katawhan para sa tinuod nga kagawasan ug demokrasya. Padayong mohatag og inspirasyon sa mga mosunod nga henerasyon sa mga rebolusyonaryo ang ilang hul-os nga kaisog ug kaalam diha sa pagpasulong sa rebolusyon.
Gipamatud-an sa NPA sa isla ang determinasyon ug kalig-on sa pag-atubang sa walay tupong nga mga sakripisyo atubangan sa walay tupong nga terorismo sa estado nga gibuhian sa rehimeng US-Marcos II pinaagi sa iyang gipakusog nga mga focused military operation (FMO) ug Retooled Community Support Program (RCSP) subay sa kamandoan sa imperyalismong US sa Armed Forces of the Philippines (AFP) nga tapuson na ang “internal security problem” (pangsulod nga sulirang pangseguridad) aron mahatagan og prayoridad ang “external defense” (panggawas nga depensa) o ang pagkonsentra sa “pagpangandam para sa pagpanalipod sa nasud” batuk sa China nga sa esensya nagbutang sa katawhang Pilipino taliwala sa nagsingabot nga pagbuto sa inter-imperyalistang gubat.
Tibuok kasingkasing nga gipasalamatan sa Communist Party of the Philippines (CPP), NPA ug tibuok rebolusyonaryong pwersa ang walay pagkaugdaw nga pagsalmot ug walay paghubas nga pagsuporta sa halapad nga linupigan ug gipahimuslang masang Negrosanon. Ang demokratikong rebolusyon sa katawhan pinaagi sa malanatong gubat sa katawhan usa ka pangmasang paningkamot. Kung wala ang ilang pagsalmot sa rebolusyon, wala ug dili makaatubang ang Partido ug NPA sa isla sa ala-demonyo nga kapintas sa pasistang rehimeng US-Marcos II.
Walay tupong ang kagrabehon sa krisis ug pagkunhod sa panginabuhian sa tibuok isla karon mugna sa hingpit nga pagpatuman sa mga neoliberal nga polisiya sa imperyalismong US ug uban pang kontra-pumuluyo ug kontra-rebolusyonaryong mga tikang nga naka-apekto sa mayoriya sa katawhang mamumugon, mag-uuma, mamumuo-sa-uma, mananagat, propesyunal, intelektwal ug uban pang sakop sa petiburgesya sa syudad, lakip na ang mga nasudnong burgesya ug pila ka seksyon sa nagharing hut-ong. Nagdugang pa ang pagtiurok sa panginabuhian sa masa sa paghasmag karon sa lain na sab nga natural nga kalamidad nga El Niño nga moabot pa kutob sa Mayo niining tuiga. Sa pila pa lang ka bulan, daku na ang kadaot nga namugna sa panginabuhian sa katawhan ilabina sa kabanikanhan.
Sa nagkagrabeng sitwasyon sa kasamtangan, masaksihan sa katawhan ang inutil, bangkarote, makinaugalingon ug maki-langyawng baruganan ug lakang sa rehimeng US-Marcos II. Inay nga tubagon ang panginahanglan sa katawhan, padayong nagkakusog ang terorismo sa estado aron pahilumon ang kinsa mang mosaway o moreklamo ug nagyugot sa nagharing pundok ni Marcos Jr.
Ang katawhang Negrosanon amgo nga nangita sa dalan alang sa tinuod nga pagbag-o sa katilingban, ang dalan sa armadong rebolusyon nga gipangulohan sa hut-ong proletaryado pinaagi sa iyang Partido Komunista. Tin-aw kanila nga ang armadong rebolusyon lamang ang bugtong solusyon sa mga batakang suliran sa isla ug sa tibuok nasud. Usa kini ka makatarunganong gubat nga nagtubag sa pangandoy sa katawhan sa pagkab-ot sa tinuod nga kagawasan ug demokrasya, ug katilingbanong hustisya.
Ang tibuok nga rebolusyonaryong kalihukan nakaangkon og bag-ong kusog pinaagi sa karon nga kalihukang pagtul-id. Busa, ang Partido ug NPA uban sa tanang rebolusyonaryong pwersa sa rehiyon wala nahadlok sa mga kabangis ug pagpanghulga sa reaksyonaryong pwersa ug andam sa lain na sab nga hugna sa hagit nga nagkinahanglan sa taas nga mga sakripisyo aron mapasulong ang gubat sa katawhan sa mas taas nga ang-ang kutob sa kadaugan uban sa lapad nga katawhang Negrosanon ug sa tibuok katawhang Pilipino.
Mga kadaugan sa NPA ug sa malanatong gubat sa katawhan ilawom sa absoluto nga pagpangulo sa Partido sa Isla
Sa kinatibuk-an, malampuson ang Partido ug NPA sa Negros sa hisgutanan sa armadong pakigbisog tungod napakyas na sab niini ang pabalik-balik nga tinguha sa pasistang rehimeng US-Marcos II ug iyang armadong pwersa nga dugmokon ang NPA sa isla. Napreserba sa NPA ang iyang kusog ug napugngan ang dugang kadaot nga gimugna sa gipakusog nga mga FMO ug RCSP sa mga larangang gerilya pinaagi sa pagtul-id sa mga kahuyangan sa pagpatuman sa gerilyang pakiggubat. Labaw pang mahinungdanon, sa usa ka ang-ang, nakapalapad ug nakahimo og panugod nga subling pagtubo gikan sa mga dinagkung kapakyasan mugna sa mga internal nga kahuyangan.
Sa pagkatinuod, napatuman sa NPA sa isla ilawom sa absoluto nga pagpangulo sa Partido ang sentral nga katungdanan niini sa paglunsad sa demokratikong rebolusyon sa katawhan pinaagi sa malanatong gubat sa katawhan isip nangunang hinagiban sa Partido ug katawhan sa pagpukan sa malupigong hut-ong, sa paglumpag sa alang-alang kolonyal ug alang-alang pyudal nga sistema, ug sa pagtukod sa demokratikong estado sa katawhan ug pagpanday sa sosyalistang katilingban.
Gipamatud-an sa NPA sa isla nga usa kini ka dili matay-og nga hukbo sa katawhan tungod kay nakig-away kini sa interes ug pangandoy sa masa para sa tinuod nga kagawasan ug demokrasya. Bitbit sa mga Pulang Kumander ug manggugubat karon ang susamang pagkamapangahason ug determinasyon sa mga kumander ug manggugubat sa NPA nga unang mipatuman sa armadong pakigbisog sa isla sama nila Apolinario “Ka Boygat” Gatmaitan (rason nga ginhinganlan gikan kaniya ang rehiyunal nga kumand sa NPA sa Negros) uban ang mga mamumuo gikan sa Victorias Milling Corporation lakip sila Bobby Nuñez ug Rene Villanueva niadtong 1969 ug ang mga mingsunod pa sa sulod sa 55 na ka tuig nga paglunsad sa armadong pakigbisog sa isla sama kanilang Leonardo “Ka Jessie” Panaligan, Roselyn “Ka Jane” Pelle, Danilo “Ka Maoche” Bertolano, Rachelle Mae “Ka Hannah” Palang, Armando “Ka Pao” Sumayang Jr, Romeo “Ka Ponso” Nabas, Romeo “Ka Juaning” Nanta ug Rogelio “Ka Cocoy” Posadas. Ang NPA karon sa isla sa Negros labaw pang minghukom sa pagpadayon ug pagpakusog sa gubat sa katawhan sa rehiyon.
Gikan sa 70 ka elemento sa NPA sa Central Negros nga mibarug alang sa batakang prinsipyo sa Partido ug mikuyog sa Ikaduhang Bantugang Kalihukang Pagtul-id (IBKP) kaniadtong 1994 ingon man mga kadre ug sakop sa Regional Mass Movement Commission ug Partisan Front Committee sa urban, ug pag-full time sa kabanikanhan sa 78 ka kadre gikan sa kasyudaran, nitubo ang NPA sa Negros ngadto sa lima ka larangang gerilya. Wala mapapas sa reaksyonaryong pwersa ang NPA sa panahon nga iskwad lang kini kaniadtong 1969 o sa dihang nagrekober pa pinaagi sa IBKP kaniadtong 1994-1998 tungod sa grabeng kalibutanon ug lokal nga krisis nga minghaling sa kalayo sa rebolusyon. Hinungdan man kini nga hangtud karon, napakyas ang kaaway sa pagdugmok sa rebolusyonaryong kalihukan sa isla nga padayong nagpatuman ug nagpasulong sa tulo ka integradong katungdanan sa malanatong gubat sa katawhan—paglunsad sa armadong pakigbisog, pagpatuman sa agraryong rebolusyon ug pagtukod sa baseng masa.
Tuman ka bahandianon ang 55 ka tuig nga kasinatian sa paglunsad og armadong pakigbisog sa isla. Mosilbi kining puhunan sa dugang nga pagsikad sa umaabot nga mga katuigan. Angayang tukma ug diyalektiko nga pamaagi nga tan-awon ang positibo ingon man ang negatibong mga aspeto. Ang positibong mga aspeto mao ang puhunan sa pagsikad samtang ang mga leksyon sa negatibong nagbabag sa paglambo sa gubat sa katawhan mahimong iwag sa subling pagsubay sa tukmang dalan sa pakig-rebolusyon.
Ang mga internal nga kahuyangan sa ideolohiya, pulitika ug organisasyon ang hinungdan sa mga paghuyang ug pag-atras sa miaging mga tuig. Nangibabaw karon ang sakit sa suhetibismo nga nangunang dagway ang empirisismo sa tibuok lawas sa Partido. Nagbunga kining sakit sa ideolohiya sa sakit sa Tuo nga oportunismo sa natad sa pulitika ug burukratismo sa natad sa organisasyon. Partikular sa natad sa armadong pakigbisog, makita ang kusog nga slog sa konserbatismo sa pulitika ug militar sa miaging mga tuig apan nagsugod na ang seryosong paningkamot sa mga yunit sa NPA sa isla aron mapatigbabawan kini.
Sa lima ka tuig nga implementasyon sa Memorandum Order (MO) 32, nakaya sa NPA sa Negros nga mapreserba ang lima ka larangang gerilya bisan sa gipakusog nga mga FMO ug RCSP sa kaaway nga migamit sa pito ka batalyon sa AFP ug siyam ka kumpaniyang pangmaniobra sa Philippine National Police (PNP). Nag-atubang ang matag larangang gerilya sa usa ka batalyon sa reaksyonaryong armadong pwersa o sobra pa. Maisip nga kadaugan ang pagpakyas sa kontra-rebolusyonaryong kampanya sa kaaway gikan sa ulahing bahin sa 2018 ngadto sa unang tulo ka bulan sa 2024, apan sa proseso nakaangkon usab og mga grabeng kahuyangan ug kasaypanan nga nagbabag sa dugang nga paglambo sa gubat sa katawhan.
Mikaon pa og panahon sa wala pa nakahimo og mga mahukmanong lakang alang sa anam-anam nga pagsulbad sa “self-constriction” (pagpahiktin sa kaugalingon) sa dagway sa pagtuyok-tuyok sa mga komportable ug paboritong lugar, ug sobrang konsentrasyon o pagtapok sa dakung pormasyon sa taas nga panahon nga mingbunga og mga mahukmanong panagsangka nga dili paborable sa mga Pulang manggugubat ug nakadaot sa baseng masa. Gisulbad ang “self-constriction” sa mga larangang gerilya pinaagi sa pagtutok sa gimbuhatong eskpansyon nga miabli og mga bag-ong erya ug miresulta sab sa rekoberi sa pila ka lugar nga madugay nang gibiyaan ug may uban nga pila na ka dekada bag-o nabalikan. Apan, wala gipasagdan ang mga erya nga anaa ang pokus sa kaaway.
Ang maayong resulta sa gimbuhatong ekspansyon sa mga larangang gerilya sa mga erya nga nipis ang pwersa sa kaaway o wala silay tropa nagpakita lang sa limitasyon sa pwersa sa reaksyonaryong rehimen nga duphan ang gilapdon sa kabanikanhan sa isla sa Negros. Tungod milapad ang erya nga naabot sa gimbuhatong masa, anam-anam nga napulihan sa mga bag-ong rekrut ang mga yunit sa NPA. Tukma lang nga dugang pa nga palapdon ang mga larangang gerilya ug sonang gerilya nga lapaw sa makaya nga langkubon sa tropa sa kaaway.
Nahimong leksyon sa gimbuhatong ekspansyon ang disbentaha sa paggamit og dakung yunit sa NPA sa pagsulod sa bag-ong erya nga nagkinahanglan usab og dakung besingan ug suplay, lisod ang mobilidad ug mobilin og agi hinungdan nga sayo mamatikdan sa kaaway. Nahimong hinay usab ang gimbuhatong ekspansyon sa dihang gi-una ang gahi nga mga erya imbes nga magsugod sa humok. May kaso sab nga nahigot sa “walay kahibalo sa gipunting nga erya nga ablihan” maong wala dayon giduso ang plano sa ekspansyon.
Ang mga napunting nga kahuyangan susama sa sulog sa pagkampante ug pagpakuntento sa unsa lang ang maabot ug sulog sa dili seryosong pagpalibog sa mga sirkumstansya. Gipakamubo ang kapasidad sa kaaway ug may kaluagan sa disiplinang militar. Gipunting ug gisaway na kini ug anaa na sa proseso sa pagpatigbabaw.
Kadungan sa pagpatuman sa gimbuhatong ekspansyon, gisulbad ang suliran sa sobrang konsentrasyon pinaagi sa paggamit sa relatibong dispersal alang sa gimbuhatong masa ug aron mas lapad ang erya nga makab-ot. Tungod niini, daghang mga kauban ang nabansay sa pagdumala sa nagkadaiyang pormasyong gerilya. Ingon man, natubag ang suliran sa suplay, mobilidad, besingan ug agi sa yunit. Busa, mas nagkanihit ang armadong engkwentro tali sa militar ug hukbo sa katawhan ilabina sa ikaduhang bahin sa 2023 hangtud karon.
Taliwala sa sustenido ug dinagkung mga FMO sa kaaway, wala nawala ang paningkamot sa NPA nga makalunsad og mga taktikal nga opensiba sa miaging tuig apan wala maangkon ang hingpit nga kadaugan subay sa kinaiya sa gerilyang pakiggubat nga mopadugo sa kaaway pinaagi sa libuan ka mga samad sa lawas ug panagsang hapak sa ulo. Gikan sa Enero 2023 hangtud Pebrero niining tuig, 62 ka aksyong militar ang nahimo sa NPA sa tibuok isla nga nakasakmit og 22 ka armas ug uban pang kagamitang militar, ug nakadaot sa dili momubo sa 70 ka elemento sa kaaway, kung asa 40 ang napatay sa pangsangka.
Tataw nga tuman ka gamay ang batakang taktikal nga opensiba itandi sa mga atritibo ug punitibong aksyon. Usa kini ka dagway sa konserbatismong militar. Nahimong kahuyangan ang kakulang sa mamugnaong plano ilabina sa hisgutanan sa gimbuhatong paniktik, kulang usab sa pagpakisusi sa kahimtang sa kaaway partikular sa mga huyang niini, ug adunay kalisdanan pa ang pila ka Pulang kumander sa pagdumala sa tunga-tungang bahin sa panagsangka nga mosiguro sa madinaugong pagkumpiska sa armas, ug uban pa.
Sa pagpaasdang sa gubat sa katawhan, padayon ang paningkamot sa rehiyon sa pagpataas sa kapasidad sa awayan hisgutanan sa pagplano sa larangang gerilya ug tali sa mga larangan ug sa ilang pagdumala ug koordinasyon nga gikinahanglan kaayo alang sa dugang mobilidad, pleksibilidad ug inisyatiba. Gitukod ang mga teatro sa gubat nga adunay paborableng tereyn sa mga utlanan sa mga lungsod ug syudad, adunay kumbinasyon sa bukid ug patag nga kayutaan, mga suba ug kasapaan, ug adunay sumpay sa kanait nga mga larangang gerilya ug mga sentro sa pulitika. Hagit karon ang dugang pagpalig-on sa mga larangang gerilya ug ang pagtukod og dugang pa hangtud matukod ang mga lapad nga teatro sa gubat ug mapalambo ang kumpleto nga istruktura sa pwersa sa NPA, sa lokalidad hangtud sa yunit milisya ug yunit pangdepensa sa baryo, ingon man sa mga yunit partisano para sa mga ispesyal nga operasyon sa mga sentrong urban.
Mahinungdanon ang pagsalmot sa masang mag-uuma sa paglunsad og malanatong gubat sa katawhan. Ang NPA usa man ka hukbo sa mag-uuma. Ang mga tibuok panahong Pulang manggugubat sa isla gisuportahan sa libuan ka masang Negrosanon ug gipalig-on sa gatusan ka mga sakop sa yunit milisya ug yunit pang-depensa sa mga rebolusyonaryong organisasyong masa isip dugang ug reserba nga kusog sa NPA. Daku ang ilang papel sa pagpakaylap sa gerilyang pakiggubat pinaagi sa paglunsad og mga atritibong aksyon ug mga magagmay’ng batakang taktikal nga opensiba. Apan dili pa hingpit nga napauswag ang katakus niining kusog sa katawhan ug angayang hatagan og igo-igong pagtagad.
Atubangan sa sustenidong mga FMO ug RCSP sa kaaway, padayong nakapahigayon sa gimbuhatong edukasyong pang-ideolohiya, pang-pulitika ug pangmilitar ug nakalunsad og mga pagbansay sa sulod sa hukbo. Apan daku pa ang trabahuonon sa edukasyon pangpulitika sa han-ay sa baseng masa tungod kay dili ingon niana kalagsik ug nagkatag ang implementasyon.
Anam-anam nga nakabawi ang pwersa sa NPA sa isla tungod sa paglapad sa ispasyo nga mas luag para sa gimbuhatong masa. Apan daku pa ang gikinahanglang paningkamot aron hingpit nga makabawi ug makabuntog sa ala demonyo nga mga atake sa kaaway. Nasulbad usab ang paglikay sa mga mahukmanong panagsangka apan kulang pa kaayo ang nadaug nga mga batakang taktikal nga opensiba uban sa gamay lang nga gipatuman nga agraryong rebolusyon ug mga kampanyang masa. Kun magpabilin ang ingon niining sitwasyon, mahimong malisod ang pagpataas sa ang-ang sa gerilyang pakiggubat ug pagpatubo sa mga organisasyong masa.
Gamay ug nagkatag pa ang nakab-ot sa pagpatuman sa agraryong rebolusyon sa isla, ilabina sa hisgutanan sa sweldo ug benepisyo sa mga mamumuo sa katubhan ilawom sa usa ka monocrop nga industriya sa kalamay. Dakung tampo sa kining suliran ang kahuyangan ug kakulangan sa gimbuhatong SICA. Sa pikas bahin, anaa pa sa unang hugna ang paglunsad sa rehiyunal nga kampanya partikular sa implementasyon sa mga neoliberal nga polisiya sa isla sa dagway sa nagkadaiyang mga proyekto sama sa reklasipikasyon ug reklamasyon sa yuta aron himuong mga “super” ug “smart” cities ang mga dagkung sentrong syudad sa isla (mga syudad sa Bacolod, Dumaguete ug Kabankalan) ug himuon kining sentro sa mga rehiyunal nga buhatan; pagpasulod sa komersyal nga plantasyon sa Palm Oil, mga makagubang operasyong mina ug quarry, ug mga renewable energy sama sa windmill ug solar farms; pribatisasyon sa mga publikong utilidad sama sa kuryente ug tubig; “modernisasyon” sa mga dyip; liberalisasyon sa humay ug kalamay; ug uban pa.
Isip tigpanalipod sa interes sa imperyalismong US ug lokal nga mga alipores niini nga dagkung komprador burgesya ug agalong yutaan, desperado ang AFP ug PNP uban ang National Task Force (NTF)-Elcac sa pagpatuman sa prinsipyong “pahubsan sa tubig ang isda aron mapatay kini.” Dakung bahin nga gition sa kaaway ang ilang pusil sa ilang giila nga rebolusyonaryong baseng masa, ilabina sa ilang giisip nga mga konsolidadong erya sa NPA, pinaagi sa sustenido ug dagkung mga FMO ug RCSP. Nakaangkon og grabeng mga paglapas sa tawhanong katungod ang daghang mga kumunidad sa mag-uuma sa Negros.
Dul-an 700 na ka insidente ang namonitor nga pag-abuso sa tawhanong katungod sa isla sa Negros ilawom sa gahum ni Marcos Jr. Kapin 46,000 ang mga biktima, halos usa ka libo niini ang mga kabataan. Nagsabwag kini og grabeng kahadlok sa katawhang Negrosanon. Apan uban sa subling pagpalagsik sa NPA, anam-anam usab nga nakatigom og kaisog ang masang Negrosanon aron sagubangon ang militarisasyon sa kabanikanhan.
Sa kasyudaran, padayon usab ang kontra-imperyalista, kontra-pyudal ug kontra-pasistang kampanya nga nagtubag sa internasyunal, nasyunal ug lokal nga mga panawagan ug isyu nga nag-apekto sa lapad nga katawhan. Gitibuok sa ligal nga demokratikong kalihukan ang pagsukol sa katawhan sa mga neoliberal nga polisiya nga gipatuman diri sa Negros, mga makadaot nga mina ug quarry, pagtaas sa presyo sa gasolina ug mga batakang panginahanglan sa katawhan, mga reklamasyon sa baybay, pribatisasyon sa tubig ug kuryente, pag-phaseout sa mga dyip, mga mabug-at nga buhis sa mga batakang palaliton, ug ang pagpanghilabot sa US ug China sa West Philippine Sea.
Gipanghimaraut ug gipanawagan sa katawhang Negrosanon ang pagbasura sa Maharlika Investment Fund, confidential funds ug NTFElcac. Milanog usab sa tibuok isla ang singgit alang sa hustisya, pagpahunong sa militarisasyon sa kabanikanhan, ug pagbalik sa istoryahanay pangkalinaw tali sa Government of the Republic of the Philippines (GRP) ug National Democratic Front of the Philippines (NDFP). Mikuyog usab ang ligal nga kalihukang masa sa tibuok kalibutan sa panawagan nga hunongon na ang pagpanglupig sa katawhang Palestino ug tapuson na sa Israel ang pagpanakop sa Gaza.
Maayo kay anam-anam usab nga nagrekober ang ligal nga demokratikong kalihukan gikan sa grabeng atake sa reaksyonaryong pwersa sa ilang han-ay sugod pa sa panahon sa rehimeng Duterte. Gitukod usab niini ang pinakalapad nga nagkahiusang prente batok sa nagpaantus, korap ug pasisstang rehimeng US-Marcos Jr. Daku ang natampo sa mga tawong simbahan para sa pagpadasig sa kampanyang masa sa miaging tuig. Maisogon ug determinado ang mga aktibista ug progresibong mga organisasyon bisan gipuntirya sa reaksyonaryong estado ug nahimong biktima sa nagkadaiyang mga dagway sa paglapas sa tawhanong katungod.
Sa kinatibuk-an, anaa sa pasiunang paningkamot ang kalihukang masa sa kasyudaran sa pagbuntog sa mga sulog sa Tuong oportunismo sa dagway sa repormismo, legalismo ug uban pa. Sa giya sa Partido, buhi ang paningkamot nga subling tukuron ang malig-on nga kalihukang masa sa kasyudaran nga mohimulag sa nagharing pundok sa nagharing hut-ong ug mopugong sa pagpadala sa kabanikanhan og dugang pwersang militar batok sa katawhan ug mga rebolusyonaryong pwersa sa mga larangang gerilya.
Bisan ang armadong pakigbisog ang prinsipal nga porma sa rebolusyonaryong pakigbisog karon samtang wala pa masakmit ang pulitikanhung gahum sa tibuok nasud, ang ligal nga porma sa pakigbisog sa kasyudaran giisip nga segundaryo apan dili mapadaplin nga porma sa pakigbisog. Katimbang kini sa armadong pakigbisog sa kabanikanhan.
Mga mahagiton nga makigbisogong tahas sa umaabot nga tuig
Ang Partido pinaagi sa KRPIN ang nangulo sa pagpasulong sa rebolusyon sa kabanikanhan ug kasyudaran sa isla sa Negros. Malig-on ug hugot ang panaghiusa sa mga kadre ug sakop sa Partido, uban ang mga Pulang kumander ug manggugubat sa NPA, sa pagduso sa rebolusyonaryong gimbuhaton ug katungdanan taliwala sa nagkagrabe pang terorismo sa estado. Puno sa rebolusyonaryong optimismo nga mapatigbabawan ang mga kahuyangan ug kakulangan sa ideolohiya, pulitika ug organisasyon, labaw pang pursigido ang rebolusyonaryong pwersa sa pagpatuman sa mga mahagitong gimbuhaton niining tuiga aron mapaasdang ang malanatong gubat sa katawhan sa isla sa mas taas nga ang-ang ug makatampo sa pangkinatibuk-ang pag-abante sa demokratikong rebolusyon sa katawhan sa tibuok nasud.
Hingpit nga resolbado ang Partido, NPA ug tibuok rebolusyonaryong pwersa sa rehiyon sa pagpatuman sa kalihukang pagtul-id nga gipanawagan sa Komite Sentral ug Ikaduhang Kongreso sa CPP niadtong 2016 subay sa Marxismo-Leninismo-Maoismo (MLM) ug mga batakang prinsipyo sa Partido. Gigamit niini nga iwag ang sumada sa mga kasinatian sa rehiyon sa pagpangibabaw sa mga napunting nga sakit sa ideolohiya, pulitika ug organisasyon nga nakababag sa kumprehensibo nga paglambo sa rebolusyon sa isla. Kinahanglan nga mahimong maayo sa pagkat-on ug diha-dihang mokuha og leksyon gikan sa mga positibo ug negatibo nga kasinatian, ingon man sa mga leksyon gikan sa kaaway.
Absoluto ang pagpangulo sa Partido sa NPA nga nagkahulogan nga ang pulitika ang momando sa pusil. Militanteng manguna ang Partido nga anaa sa nagkadaiyang pormasyon sa hukbo sa katawhan hangtud sa mga rebolusyonaryong organisasyong masa sa pagpatuman sa rebolusyonaryong linya, mga gimbuhaton, patakaran, polisiya ug disiplina. Gipasiguro ang pang-ideolohiya ug pang-pulitikang edukasyon sa mga Pulang kumander ug manggugubat, lakip na ang ilang mga pagbansay. Ipatin-aw kanila ang mga batakang prinsipyo sa nasudnon demokratikong rebolusyon pinaagi sa malanatong gubat sa katawhan nga adunay sosyalistang perspektiba ug ang tulo ka integradong gimbuhaton sa gubat sa katawhan.
Gisiguro sa Partido ang epektibong pagpalihok sa mga pwersa sa NPA ug ang paghatag sa tukma ug tin-aw nga mga instruksyon sa gimbuhaton. Gisusi sab niini ang paglambo sa pagpatuman sa mga rebolusyonaryong gimbuhaton, ug gidumalahan ang mga pagtasa ug pagsaway ug pagsaway-sa-kaugalingon sa han-ay sa NPA.
Ang madasigong pangpulitikang gimbuhaton sa sulod sa NPA ang magpataas sa kaamguhan ug kaakuhang makig-away sa mga Pulang kumander ug manggugubat ug lig-ong mopanday sa ilang diwang mo-alagad sa katawhan. Gipalig-on niini ang panaghiusa sa hukbo sa katawahn ug mga masa ug tali sa mga opisyal ug manggugubat. Gikuptan man niini ang demokrasya sa natad sa ekonomiya, pulitika ug militar sa sulod sa NPA.
Sa umaabot nga tuig, gawas sa padayong pagpakyas sa pangandoy sa kaaway nga dugmokon ang rebolusyonaryong kalihukan sa isla sa Negros, gikinahanglang dugang mapadaku ang kusog sa NPA sa hisgutanan sa erya ug pwersa. Yawe diri ang daghang madinaugong dagku ug gagmay’ng taktikal nga opensiba, kuyanap nga paglunsad og kontra-pyudal nga pakigbisog ug mga kampanyang masa katimbang ang paspas nga pagpalapad ug pagkonsolida sa baseng masa sa tibuok nga isla. Kung maayong mapatuman ang tulo ka integradong gimbuhaton, siguradong mahimong tinubdan kini sa rebolusyonaryong kusog alang sa pagsulong.
Ipadayon ang pagpangibabaw sa mga kahuyanagn sa “self-constriction” ug sobrang konsentrasyon sa mga yunit sa NPA. Mahimong maalamon sa pag-aplikar sa gerilyang taktika sa konsentrasyon, dispersal ug shifting subay sa sitwasyon sa gubat. Anihon ug palambuon ang nakab-ot sa gimbuhatong ekspansyon. Dugang palapdon ug palawmon ang mga erya sa tanang larangang gerilya. Paningkamotang makapalapad gawas sa makayang langkubon sa mga FMO ug RCSP aron mas mahimong luag ang maniobra ug mapahigayon ang gimbuhatong masa, militar ug uban pang kumprehensibong buluhaton. Ingon man, mahimong mamugnaon sa pagrekober ug pagmentina sa mga konsolidadong erya aron magiyahan ang mga masa sa ilang pagsukol ug pagsagubang sa kusganong atake sa kaaway.
Sa pagpatuman sa rebolusyonaryong gimbuhaton, angayang ipahaom ang pormasyon sa NPA sa katakus sa baseng masa ug sa kinaiya ug lihok sa kaaway. Himuong kalihukan ang sekreto nga paglihok aron dili dayon matandog ang pagrekober sa baseng masa ug ang gimbuhatong ekspansyon.
Mahinungdanong aspeto sa malanatong gubat sa katawhan ang gerilyang pakiggubat sa masa. Daku ang ginsakpan sa atong yunit milisya ug uban pang mga pormasyon sa lokal nga gerilya. Kinahanglang mapataas usab ang ilang katakus sa pagtuon sa sitwasyon sa gubat, kahibalo sa mga teknika ug taktika sa kaaway, disiplinang militar, sekretong paglihok ug mga gerilyang taktika ug operasyon isip nangunang makinarya sa NPA sa isla alang sa paglunsad sa mga opensibang aksyon.
Subay sa nagkakusog nga mga FMO ug RCSP, mahimong mamugnaon ug mapahaumon sa pag-konsolida sa tanang mga pwersa—sa Partido, NPA ug rebolusyonaryong masa. Padayong ilunsad ang mga pang-Partidong pagtuon ug ang PADEPA sa NPA, mga lokal nga gerilyang pormasyon sama sa yunit milisya, ug mga organisasyong masa ilabina kabahin sa mga batakang prinsipyo ug patakaran sa Partido ug mga sinulat nila Kaupod Mao Zedong, Kaupod Ho Chi Minh ug Kaupod Jose Maria Sison partikular sa gubat sa katawhan. Hatagan usab og prayoridad ang pulitiko-militar nga pagbansay sa mga Pulang manggugubat ug yunit milisya ug ang batakang kurso alang sa mga opisyal aron mahimong dungan ang paglambo sa kahibalo sa rebolusyon ug katakus sa pakig-away. Seguraduhon ang kaluwasan sa pagpahigayon sa mga pagtuon ug pagbansay.
Ikampanya ang pagtuon sa sumada sa rehiyon aron makuptan ang mga leksyon sa positibo ug negatibong kasinatian sa milabay’ng lima ka tuig nga pakigrebolusyon. Molunsad usab og mga pagtuon sa mga batakang dokumento nga gitakda sa Komite Sentral kalabot sa paglunsad og kalihukang pagtul-id. Kining mga pagtuon nagtinguha sa pagbuntog sa empirisismo sa dagway sa mekanikal nga estilo sa pagtuon ug pagtrabaho ug sa paghibalo ug pagbansay sa pag-aplikar sa MLM sa kongkretong kahimtang sa Pilipinas ug pagpalambo sa atong rebolusyonaryong praktika.
Alang sa pagtukod sa mga teatro sa gubat, kinahanglang mohimo og mahukmanong plano sa pagpalig-on sa mga larangang gerilya ug pagsira sa mga bulhang sa tunga niini. Mahinungdanong sangkap ang pagkab-ot sa mga larangang gerilya sa tipikal nga istruktura sa pwersa nga usa ka kumpaniya nga adunay platun isip sentro-de-grabidad ug ang ubang mga yunit gerilya nagkatag sa mas lapad nga radyus. Kinahanglang palambuon usab ang pagpangulo ug koordinasyon aron maangkon ang mas daku ug pinakamaayong katakus sa rebolusyonaryong kusog.
Daku ang papel sa madinaugong mga batakang taktikal nga opensiba nga gisuportahan sa atritibo nga mga taktikal nga opensiba sa pangkinatibuk-ang pagrekober ug pagpadasig sa rebolusyonaryong kalihukan sa isla sa Negros. Napamatud-an na sa rebolusyonaryong kasinatian sa isla nga ang paglunsad og mga taktikal nga opensiba nga makaya natong daugon mopakusog sa NPA ug sa tibuok rebolusyonaryong kalihukan. Busa, gikinahanglan kitang molunsad og sustenido ug mapangahasong mga taktikal nga opensiba subay sa makaya sa atong kusog. Pangitaon ang huyang nga bahin sa kaaway ug mopalambo og mga bag-ong taktika. Sa gihapon, motuon kita sa pagpakig-away diha sa awayan.
Sama sa paglunsad og madinaugong taktikal nga opensiba, kinahanglan usab ang kaylap nga paglunsad og agraryong rebolusyon ug ubang kampanyang masa. Mahukmanon niini ang gimbuhatong SICA (o katilingbanong pakisusi ug pagtuki sa hut-ong) sa mga organo sa Partido ug mga yunit sa NPA aron mapunting ang mga yawe nga isyu nga makapapukaw, makapa-organisa ug makapalihok sa mas daghan ug halapad nga masa. Importanteng mapataas usab ang atong katakus sa paglunsad og mga kampanya gikan sa ang-ang sa sityo ug inter-sityo, hasyenda ug inter-hasyenda paingon sa inter-baryo, munisipal, distrito hangtud sa ang-ang sa probinsya ug rehiyunal nga langkub.
Ang pagpatuman sa agraryong rebolusyon yawe usab sa paspas nga pagkonsolida ug pagpalapad sa baseng masa. Samtang mopabuto og mga kontra-pyudal nga pakigbisog ug uban pang mga kampanyang masa, segurohon nga uban niini ang pagtukod og organisasyong masa. Angayang mapatigbabawan ang kahuyangan nga makuntento lang sa paglunsad sa kampanyang masa kutob sa pagmobilisa sa mga masa apan walay katugbang nga pagtukod sa solido nga kusog sa masa pinaagi sa pagtukod sa mga nagkadaiyang mga batakang organisasyong masa sa mga mag-uuma, mamumuo-sa-uma, kababayen-an, kabatan-onan, mga bata, grupong pangkultura, mananagat ug uban pa.
Ang mga kampanyang masa makapapaspas sa pag-ani sa pinakamaayong mga rekrut para sa Partido ug NPA. Pinaagi niini makapatumaw og mga bag-ong masang aktibista ug lider ug subling mo-aktibo ang mga nangaluya ug daang mga pwersa. Apan, angayang magmabinantayon sa subling pagdawat sa rebolusyonaryong han-ay sa mga nagpahuway ug nagsurender. Angayang mo-agi sa proseso subay sa patakaran ug adunay makuting pagpakisusi sa tagsa-tagsa ka sirkumstansya. Mobantay og maayo nga dili makapasulod sa bisan usa ka dautang elemento.
Ang paglunsad og kampanyang masa angayan usab nga mobunga og paglapad sa nagkahiusang prente ilabina sa mga tunga-tungang pwersa, lakip na ang mga adunahang mag-uuma ug nasudnong burgesya ug bisan pila sa han-ay sa nagharing hut-ong sama sa nalamdagang mga agalong yutaan ug mga pulitiko.
Dakung bahin niining tuiga ang paghasmag sa El Niño sa atong nasud. Kuyanap ang mas grabeng kagutom ug kalisdanan sa panginabuhian sa katawhan nga mugna niining kalamidad ilabina sa kabanikanhan. Segurado nga imbes luwason ang katawhan, unahon sa reaksyonaryong gobyerno ang ilang makikik sa pondo sa kalamidad samtang murag bao ang pagtanyag og ayuda sa masa. Gilauman usab nga mas pakusgon pa sa AFP/PNP/NTF-Elcac ang mga operasyong militar, operasyong paniktik ug mga civil-military operations nga sa esensya pagpanglingla sa katawhan sa mga komunidad sa mag-uuma nga modugang pa sa pag-antus sa masa.
Angayang mapangulohan ang masa sa ilang pakigbisog sa panahon sa El Niño sama sa pagpaningil sa reaksyonaryong gobyerno og ayuda ug ingon man, ibuksas ang puno sa korapsyon, pagka-makinaugalingon ug pagka-inutil sa pagsalo sa mga masa sa rehimeng US-Marcos II. Ilunsad usab ang mga kampanya sa produksyon sa nagkalain-laing dagway sama sa pagtukod og mga sistema sa patubig ug uban pang pamaagi nga mopalambo sa produksyon bisan sa panahon sa tuman ka uga ug init. Diri mas matandi sa masa ang kalainan sa NPA ug sa reaksyonaryong AFP, PNP ug mga paramilitar nga grupo sa hisgutanan sa tinuod nga pagtabang sa masa. Pinaagi usab niini hinay-hinay nga mapangibabawan sa masa ang kahadlok ug mabutang sa depensiba ang kaaway.
Ang madinaugong kampanyang masa makahatag usab og kahigayonan nga makapalapad sa mga bag-ong erya ug makab-ot ang mga erya nga dili pa kayang kab-uton sa NPA. Kinahanglang mopadala og mga tim nga moatiman sa gimbuhaton sa pagpangandam sa sonang gerilya ilabina sa mga erya sa daplig hi-way, daplig suba, daplig dagat ug patag ug sentro sa mga lungsod.
Dili mapadaplin sa Partido ang mahinungdanong papel sa ligal nga demokratikong kalihukan sa kasyudaran sa pagpakusog sa armadong pakigbisog sa kabanikanhan. Kinahanglang mapakusog ang mga mobilisasyong masa subay sa mga dagkung isyu nga ilang gi-atubang karon ilabina ang pagpatuman sa neoliberal nga polisiya diri sa isla sa Negros. Sa hugot nga paglambigit sa mga isyu sa masa sa kasyudaran sa kontra-pyudal nga mga isyu sa kabanikanhan, mapalanog ang pagka-makatarunganon sa armadong pakigbisog.
Angayang padasigon ang mga dayag nga organisasyong mas ug tukuron ang lapad ug lawom nga mga tinagong organisasyong masa ug network. Lakip sa gimbuhaton sa kalihukang masa sa kasyudaran ang pagtukod sa pinakahalapad nga nagkahiusang prente nga momugna og siak sa han-ay sa nagharing hut-ong ug tay-ugon ang kaaway’ng hut-ong sa ilang balwarte. Ang dakung sukdanan sa kadaugan sa kalihukang masa sa kasyudaran mao ang daghang rekrut alang sa NPA, alang sa kalihukang mag-uuma ug uban pang mga gimbuhatong nagsuporta sa armadong pakigbisog sa kabanikanhan. Ingon man, makapatumaw kini og suporta lohistika ug materyal ug uban pang rekurso alang sa armadong pakigbisog.
Ang NPA maoy naghatag og inspirasyon sa kalihukang masa sa kasyudaran. Busa, gidawat niini ang mga rebolusyonaryo nga wala nay katakus molihok sa kasyudaran tungod sa grabeng red-tagging ug pagpangsalbeyds sa mga aktibista ug lider masa.
Labaw’ng mitataw karon nga ang Partido ug ang NPA mao ang tinuod nga mibarug sa interes ug kaayuhan sa katawhang Negrosanon ug sa tibuok katawhang Pilipino batok sa pagduso sa neoliberal nga polisiya ug programa sa isla ug sa kaluha niining paggrabe sa terorismo sa reaksyonaryong estado. Mas nagkalawom pa ang suporta sa halapad nga masa sa rebolusyonaryong armadong pakigbisog. Karon itandi sa miagi, tataw nga ang demokratikong rebolusyon sa katawhan pinaagi sa malanatong gubat sa katawhan usa ka makatarunganon nga gubat, ingon man, makatarunganon ang magrebolusyon. Sa niining basehan, ang NPA usa ka hukbo nga dili mapukan bisan kanus-a man.
Isulong ang interes ug kaayuhan sa katawhang Negrosanon ug tibuok katawhang Pilipino!
Batukan ang neoliberal nga polisiya sa imperyalismong US pinaagi sa reaksyonaryong estado sa mga dagkung kumprador burgesya ug agalong yutaan!
Pakyason ang mga FMO ug RCSP sa kaaway!
Tapuson ang terorismo sa reaksyonaryong estado ug kab-uton ang katilingbanong hustisya!
Isulong ang demokratikong rebolusyon sa katawhan pinaagi sa malanatong gubat sa katawhan sa mas taas nga ang-ang!
Mabuhi ang CPP-NPA-NDF!
NegrosRevPortal 