Hunyo 10, 2024
Ginpangransak sa mga armadong soldado idalom sang 94th IB kag elemento sang Citzen Armed Geographical Unit (CAFGU) ang pito ka kabalayan sa Sityo Cabagal, Barangay Buenavista, Himamaylan City, Negros Occidental, alas 2:00 sang kaagahon, Hunyo 7, 2024.
Nagpamukaw ang mga militar sa mga kabalayan pero wala ini ginbuksan sang mga pumuluyo bangud sa kahadlok kag nadumduman nila ang natabo sa pamilya Fausto sa ila kaingod nga sityo nga ginmasaker sa mga militar.
Bangud sa kaakig sang mga soldado, ginpangsipa nila ang pwertahan sa mga balay tubtob nga nagkalaguba kag nagkalakakas ang mga ini. Isa sa mga biktima ang pamilya ni Leo De Baguio, nga ginapilit sa tropa militar nga padul-ongon sa ila kampo-militar. Nagpamalibad ang sibilyan nga mangunguma nga magdul-ong bangud sa kahadlok kapin pa nga ginaharas na sila sa mga militar kag nagakabalaka siya sa matabu sa iya kon mag-upod siya sa nasambit nga militar.
Duha lang ang detatsment nga malapit sa amo nga sityo, ang Hilamonan kag Mahalang detatsment. Dapat pasabton kag ipakamalaot ang mga tropa sang 94th IB kag mga paramilitar sa sini nga mga detatsment sa ginahimo nila sa mga sibilyan ilabi na sa mga nga mangunguma panahon sa ila operasyon.
Reference:
Ka Dionesio Magbuelas
Tigpamaba
Mt. Cansermon Command-New People’s Army
South Central Negros Guerrilla Front
NegrosRevPortal 